Bes memlekettiń elshisi Qazaqstandaǵy qyzmetine kiristi
Atap aıtqanda, Lıvannan - Jıskar Ál-Hýrı, Ýkraınadan - Ivan Kýleba, Brazılııadan - Marsııa Donner Abreý, Germanııadan - Tılo Klınner, sondaı-aq, Pákistan Islam Respýblıkasynyń atynan Imtıaz Axmad Kazı ejelgi dástúr boıynsha óz prezıdentteriniń sálemin jetkizip, eki jaqty baılanystardy nyǵaıtýǵa ýáde berdi. QR Prezıdenti Nursultan Nazarbaevqa ózderiniń senim gramotalaryn tapsyrdy.
Lıvan Respýblıkasynyń elshisi Jıskar Ál-Hýrıdiń aıtýynsha, atalǵan memlekette Qazaqstannyń jetistikterin jiti qadaǵalap otyrady. Ásirese, ıadrolyq qarýsyz álemdi quryp, teń quqyly qarym-qatynasty júrgizý ustanymyn qoldaıdy. Lıvan da osy kózqarasty ustanady. «Biz de kópultty saıasatty júrgizip kelemiz. Negizi, bizdiń dostyǵymyz eki eldiń yntymaqtastyǵyn kúsheıtip qana qoımaı, Taıaý Shyǵys pen Ortalyq Azııada qaýipsizdikti de saqtaýǵa múmkindik berip otyr», - dedi J.Ál-Hýrı.
Al Brazılııa elshisi Marsııa Donner Abreý sharaǵa kelgen jýrnalıstermen qazaq tilinde amandasty. Onyń aıtýynsha, Brazılııa men Qazaqstan geografııalyq jaǵynan bir-birinen alys ornalassa da, damýshy ekonomıka men kópultty saıasat jaǵynan uqsas. Elshi xanym MERKOSÝR (Mercado Comu'n del Cono Sur - MERCOSUR) men Eýrazııalyq ekonomıkalyq odaq arasynda baılanys ornatýdy qoldaıdy. Atalmysh saýda-ekonomıkalyq odaqqa Argentına, Brazılııa, Paragvaı men Ýrýgvaı kiredi.
«Bálkim, bolashaqta eki odaqtyń arasynda ózara saýda týraly kelisim rásimdeledi. Budan bólek, aýyl sharýashylyǵy, balamaly energetıka, taý-ken, mádenıet pen sport salasynda tyǵyz qarym-qatynas ornatýǵa bolady dep oılaımyn. Qazaqstanda velosport jaqsy damyǵan. Al Brazılııada fýtboldy jaqsy kóredi. Sosyn bizde aýdıovızýaldy ındýstrııa jaqsy damyp keledi. Dıplomatııalyq akademııalar arasynda taǵyz qarym-qatynas ornatylǵan. Mysaly, qazir bir qazaqstandyq dıplomat bizdegi akademııada dáris alyp júr. Qazaqstandaǵy akademııa da óz shaqyrýyn jiberdi. Brazılııanyń kongresi úlken qyzyǵýshylyq tanytyp otyr. Sondyqtan men eki eldiń parlamentteri arasyndaǵy yntymaqtastyqty kúsheıtýge kúsh salamyn», - dep atap kórsetti M.Donner Abreý.
Germanııa elshisi Tılo Klınner eki eldiń qazirgi saýda-sattyǵyn «jaqsy» dep baǵalady. Resmı málimetke sáıkes, Qazaqstan men Germanııa arasyndaǵy bir jyldyq saýdanyń kólemi 6 mlrd eýrodan asyp otyr. Sonyń basym bóligi shıkizat sektoryna tıesili. «Negizi, qazirgi saýda-sattyqty eki esege arttyryp, 10 mlrd eýroǵa jetkizýge bolady. Osy maqsatqa aldaǵy úsh jylda jetýimiz kerek», - deıdi T.Klınner.
Onyń aıtýynsha, nemis kompanııalary Qazaqstanǵa kelip, jumys isteýdi qalaıdy. Máselen, osy aıda «Wilo» kompanııasy Almatynyń janynda óz óndirisin ashpaqshy. Sóıtip, sý sorǵyshtaryn Ortalyq Azııaǵa ǵana emes, Kavkaz elderine de satatyn bolady.
Ýkraına men Pákistan elshileri de eki jaqty baılanystardy damytýǵa múddeli ekenin jetkizdi.
