Bes memleket delegatsııasy Pavlodarda «Rýhanı jańǵyrý» baǵdarlamasyn talqylady
ASTANA. QazAqparat - Pavlodarda «Dúnıejúzi qazaqtary qaýymdastyǵynyń» Pavlodar oblystyq fılıalynyń uıymdastyrýymen «Qazaqstan Respýblıkasy Prezıdenti N.Á.Nazarbaevtyń «Bolashaqqa baǵdar: rýhanı jańǵyrý» baǵdarlamasyn júzege asyrý asa mańyzdy mindet» atty kezdesý ótti, dep habarlaıdy pavlodarnews.kz .
Kezdesý barysynda sóz alǵan respýblıkalyq oralmandardyń «Asar» QB-niń tóraǵasy, ekonomıka ǵylymdarynyń kandıdaty Qaırat Bodaýhan Elbasy baǵdarlamasynyń mańyzdylyǵyna toqtaldy. - Biz búgin tarıhı kezeńde bas qosyp otyrmyz, - dedi Qaırat Bodaýhan.
«Bizdiń el az ýaqyttyń ishinde álemge tanymal boldy. Ekonomıkany kóterip, saıası turaqtylyǵymyzdy arttyrý men memlekettiń ishki tynyshtyǵyn saqtaý mańyzdy másele ekeni belgili. Jastar arasyndaǵy «Rýhanı jańǵyrýdyń» alatyn orny erekshe. Memleket tarapynan jasalyp jatqan ıgi sharalar óte kóp. Ásirese kóshi-qon qıyndyqtarynyń jeńildetilgeni qýantady», - dedi ol óz sózinde.
Ózbekstan memleketiniń delegatsııa basshysy Serikbaı Úsenovtyń aıtýynsha, kórshi elde bir jarym mıllıonǵa jýyq qazaq bar. - Sonymen qatar 396 qazaq mektebi men tórt joǵary oqý bar. Bizdiń elde 138 ult bolsa, adam sany jaǵynan qazaqtar ekinshi orynda tur. Árıne biz «Rýhanı jańǵyrý» jarııalanǵan soń ony iske asyrý boıynsha belsendi jumys jasaýdamyz. Baǵdarlamanyń birneshe baǵyttaryn belgilep te qoıdyq. Ózbekstandaǵy qazaq jastary úshin Qazaqstannan 51 ýnıversıtet pen ınstıtýttardyń ókilderin shaqyryp, kórme ótkizdik. Kópshilik jastarymyz ata jurtqa bilim alýǵa attandy. Jylda 100-deı jas bet bursa, bıyl edáýir kóp bolady dep kútilýde, - dedi Serikbaı Úsenov.
Budan soń meıman «Ózbekstandaǵy qazaq mádenıeti ortalyǵynyń 25 jyldyǵy» medalin «Dúnıejúzi qazaqtary qaýymdastyǵynyń» Pavlodar oblystyq fılıalynyń basshysy Zaýr Bolatqa taqty. Sondaı-aq, «Ózbekstandaǵy qazaq aqyndarynyń antologııasy» men kórshi memlekettegi qazaqtardyń quttyqtaý hatyn berdi. Óz kezeginde Reseı, Mońǵolııa, Qyrǵyzstan men Qazaqstan elderiniń de ókilderi «Rýhanı jańǵyrý» boıynsha memleketterinde jasalyp jatqan isterge toqtala ketti.
