Bes kúnniń ishinde 2 mıllıonǵa jýyq qazaqstandyq balalar polıomıelıtke qarsy egiledi - J.Dosqalıev
ASTANA. Qyrkúıektiń 6-sy. QazAqparat - 5 kúnniń ishinde 2 mıllıonǵa jýyq qazaqstandyq balalar polıomıelıtke qarsy egiledi. Bul týraly búgin QR Densaýlyq saqtaý mınıstri Jaqsylyq Dosqalıev málim etti.
Búgin elordadaǵy №7 qalalyq emhanada 6 jasqa deıingi balalardy polıomıelıtke qarsy ımmýndaýdyń ulttyq kúniniń bastalýyna oraı ótken baspasóz máslıhatynda Densaýlyq mınıstri, búginnen bastap qyrkúıektiń 10-yna deıin 6 jasqa deıingi balalarǵa ekpe júrgiziletindigin jarııalady.
«Olardyń bir bóligine ekpe buǵan deıin jasalýy da múmkin, degenmen qosymsha egý sharalary jaqsy nátıje beredi jáne balalar aýyrmaıtyn bolady», dedi ol óz sózinde.
Mınıstrdiń atap ótýinshe, bul kúnderi 1,8 mıllıon balany egý kózdelip otyr. Búgingi tańda ımmýndaý sharalaryn 4532 egý brıgadasy, onyń ishinde 1229 jyljymaly brıgada júrgizedi. Olar shalǵaı eldi mekenderde jáne halqynyń sany az aýyldarda egý jumystaryn atqarady.
«Memleket basshysynyń tikeleı tapsyrmasyna sáıkes Úkimet qosymsha qarjy taýyp, taıaý arada Qazaqstanǵa polıomıelıtke qarsy ekpe jetkizý úshin bizdiń halyqaralyq áriptesimiz ıÝNISEF-ke ótinish jasady. Qazirgi ýaqytta Úkimet atalǵan vaktsınanyń Qazaqstanǵa jetkizilýi úshin 57 mıllıon 876 myń teńge shyǵyndady», dedi J.Dosqalıev.
«Tajikstannan aqparat alynysymen, Qazaqstannyń shekaralary kúsheıtildi. Búgingi kúni Tájikstannan bizdiń elge mıgratsııa 53 myń 958 adamdy qurady, onyń ishinde 15 jasqa deıingi balalardyń sany - 851. Bul balalarda polıomıelıtke qarsy vaktsınatsııa týraly tolyqqandy aqparattyń bolmaýyna baılanysty, Qazaqstan olardy egýdi óz mindetine aldy», - dedi ol.
Onyń sózine qaraǵanda, Tájikstan balalarynyń 97,5 paıyzy egildi.
Polıomıelıt - júıke júıesin zaqymdaı otyryp, sal aýrýyna ushyratýy múmkin, tipti ólimge alyp keletin vırýsty ınfektsııa.
