Bes kúnde tártipke baǵynbaǵan 26 jolaýshy poıyzdar men ushaqtardan túsirildi

ASTANA. QazAqparat – Qańtar aıynyń 5 kúninde tártipke baǵynbaǵan 26 jolaýshy qoǵamdyq kólikterden túsirildi. Bul týraly QazAqparat Kóliktegi polıtsııa departamentiniń baspasóz qyzmetine silteme jasap habarlaıdy.

Atap aıtqanda, jolaýshylar kólikterinen túrli ákimshilik quqyq buzýshylyqtar jasaǵany úshin 26 adam, onyń ishinde jolaýshylar poıyzdarynan - 14, áýe kemelerinen - 12 quqyqbuzýshy túsirilgen.

Máselen, 5 qańtarda Mańǵystaý-Almaty baǵytyndaǵy jolaýshylar poıyzynda Qyzylorda oblysynyń 43 jastaǵy turǵyny alkogoldik ishimdikterdi iship, balaǵat sózder aıtyp, jolserikterdiń eskertýlerine qulaq aspaǵan. Qyzylorda oblysy Sekseýil stantsııasyna kelgennen keıin poıyz bastyǵynyń aktisimen jolaýshy túsirilip, Jelilik polıtsııa bólimshesiniń qyzmetkerlerine tapsyrylǵan.

«Oǵan qatysty QR ÁQBtK-niń 440-baby 3-bóligi, ıaǵnı alkogoldik ishimdikterdi ishý nemese qoǵamdyq oryndarǵa masań kúıinde kelý jáne 434-baby 1-bóligi, usaq buzaqylyq boıynsha birden eki hattama toltyrylyp, is Qyzylorda oblysy Aral aýdandyq sotyna jiberildi», - dedi Kóliktegi PD Ákimshilik polıtsııa basqarmasynyń bastyǵy Dáýlet Moldahanov.

Polıtsııa polkovnıginiń aıtýynsha, bul er adam bir jyl ishinde alkogoldik ishimdikterdi ekinshi ret ishkeni úshin ákimshilik jaýapkershilikke tartyldy.

«6 qańtarda Aral aýdandyq sotynyń sheshimimen atalǵan quqyqbuzýshyǵa 10 AEK mólsherinde aıyppul salynyp, 2 táýlik ákimshilik qamaqqa alyndy», - dedi ol.