Bes kúnde 2 myńnan astam kólik aıyp turaǵyna qamalǵan
Bul jaıynda Іshki ister mınıstrligi Ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova aıtty. Onyń sózine qaraǵanda, 20-24 aqpan aralyǵynda ótken jedel aldyn alý sharasyna 8 myńnan astam polıtsııa qyzmetkeri, onyń ishinde 3 myńǵa jýyq avtopatrýl jumyldyrylǵan.
«Ákimshilik jaýapkershilikke 74 myńnan astam jol qozǵalysy erejelerin buzýshylar tartyldy. Onyń ishinde qoǵamdyq kólik júrgizýshileriniń 1,2 myńnan astam ret jol qozǵalysy erejelerin buzǵany anyqtaldy. Avtojoldardyń 4 myń shaqyrymǵa jýyq avarııalyq-qaýipti ýchaskeleri zerttelip, qosymsha 644 jol belgisi ornatyldy», - dedi ol ortalyq kommýnıkatsııalar qyzmetinde ótken brıfıngide.
Mamannyń aıtýynsha, jol apattarynyń basym bóligi Almaty jáne Astana qalalarynda tirkelgen.
«Adam ólimine ákep soqtyrǵan jol-kólik oqıǵasy Aqtóbe jáne Almaty oblystarynda kóp tirkeldi. Jedel aldyn alý sharasy kezinde 2000-nan astam kólik aıyp turaqtarǵa ornalastyryldy», - dedi Aqtoty Boranova.