Bes kún buryn joǵalǵan atyraýlyq BQO-dan tabyldy

Atyraý oblysynyń Isataı aýdanynda turatyn 47 jastaǵy er adam bes kún buryn habar-osharsyz ketken. Ol Batys Qazaqstan oblysynyń Jańaqala eldi mekeninen tabyldy, dep habarlaıdy Kazinform. 

Oblystyq polıtsııa departamenti baspasóz qyzmetiniń málimetinshe, er adamnyń joǵalǵany týraly týystarynan 28 qazanda habar túsken.

«Sol kúni jergilikti ýaqytpen saǵat 12:10 shamasynda Isataı aýdandyq polıtsııa bólimine 1976 jylǵy er adamnyń 3 kún buryn mal izdeýge shyǵyp, qaıta oralmaǵany habarlandy. Er adamnyń Aıbas eldi mekeninen mal izdeýge mototsıklmen shyqqany anyqtaldy. Týystary onyń alkogoldik ishimdik ishpeıtini, densaýlyq jaǵdaıynyń jaqsy, eshqandaı esepte turmaǵany, buryn habar-osharsyz ketpegeni týraly aqparat berdi», - dep habarlady departamenttiń baspasóz qyzmeti.

Isataı aýdandyq polıtsııa bóliminiń qyzmetkerleri joǵalǵan er adamnyń kók tústi «Ular250kb» markaly mototsıkli Aıbas eldi mekeninen 40 shaqyrymdaı qashyqta turǵanyn anyqtaǵan. Al búgin, 30 qazanda joǵalǵan azamat Isataı aýdanynan 270 shaqyrym qashyqtaǵy Batys Qazaqstan oblysynyń Jańaqala eldi mekeninen aman-saý tabylǵan.

«Búgin 47 jastaǵy azamatty Isataı aýdandyq polıtsııa bóliminiń bastyǵy, polıtsııa podpolkovnıgi Danııar Bımuhanov pen Isataı aýdandyq tótenshe jaǵdaılar bóliminiń qyzmetkerleri tikushaqpen týystaryna jetkizdi. Bes kúnnen keıin aman-esen tabylǵan azamattyń aıtýynsha, ol joldan adasqanyn ańǵarmaǵan. Bir jolǵa túsip, Isataı aýdanynan uzap ketkenin keıin bilgen», - dep málim etti departamenttiń baspasóz qyzmetinen.

Eske sala ketelik, budan buryn Atyraý oblysynda joǵalyp ketken 5 jasar bala káriz qudyǵynan tabylǵanyn jazǵan bolatynbyz.