Bes kún boıy aýa temperatýrasy +8 gradýstan kóterilmese Almatyǵa jylý beriledi

ALMATY. QazAqparat- Almatyda jylytý maýsymy ortasha aýa temperatýrasy 5 táýlik boıy + 8 gradýs jáne odan tómen bolǵan kezde bastalady. Bul týraly «Almaty jylý jelileri» JShS bas ınjeneri Danııar Qazymbetov málim etti , dep habarlaıdy QazAqparat tilshisi.

«Jylýdy qosý úshin qaladaǵy ortasha táýliktik aýa temperatýrasy bes kún boıy + 8 gradýs nemese odan tómen bolýy kerek. Jylytý maýsymy ákimdiktiń sheshimimen bastalady. Qazir qalamyzda kún jyly, áli +8 gradýs joq», - dedi spıker.

Onyń aıtýynsha, turǵyndar páter ıeleriniń kooperatıvi nemese múlik ıeleriniń birlestikteri birlesip, jylytý kezeńinde úıdiń úıishilik jelilerin daıyndaýy kerek.

Buǵan deıin ol bıyl megapolıste 9 shaqyrym jylý jelisi aýystyrylǵanyn aıtqan edi.

Jetinshi qazan kúni Almaty qalasynyń ákimdigi shahar jylytý maýsymyna tolyq daıyn ekenin málimdegen bolatyn.