Bes qazaqstandyq MMA-dan Azııa chempıonatynyń «altynyna» kúresedi
ASTANA. QazAqparat - 16 maýsym kúni Sıngapýrde MMA-dan Azııa birinshiliginiń aqtyq saıystary ótedi. Qazaqstan ulttyq quramasynyń bes sportshysy jartylaı fınaldyq jekpe-jekterdi sátti aıaqtap, chempıonattyń joǵary júldesi úshin kúresý múmkindigine ıe boldy, dep habarlaıdy QazAqparat.
Aldyńǵy aıqastardyń qorytyndysy boıynsha, qazaqstandyq segiz jekpe-jekshi jartylaı fınal oıyndaryn ótkizdi .
Saıystardyń úshinshi kúnin halyqaralyq arenalarda Qazaqstannyń namysyn qorǵap júrgen Aıan Tursyn ashty. Palýan qyz alǵashqy eki raýndta malaızııalyq Amıra Mahtarǵa tolassyz shabýyl jasap, úshinshi raýndta qarsylasy oıyndy toqtatýdy surady.
Qazaqstandyq taǵy bir sportshy Ernaz Musabek bahreındik Hýseın Abdýllamen jekpe-jekke shyqty jáne alǵashqy raýndta-aq býyndyrý tásilin qoldanyp, jeńiske jetti.
Oljas Moldaǵalıev te brıtandyq Raf Vozanyń jeńiske jetýine esh múmkindik bermedi.
Tóreshiler shvetsııalyq Denıel Shalanderden basym túsken taǵy bir sportshy Bekzat Jasııanyń aqtyq oıynǵa shyǵýyna biraýyzdan sheshim shyǵardy.
Ókinishke oraı, Qazaqstan ulttyq quramasynyń jekpe-jekshisi Djohar Taımýshanov teıkdaýndy sátsiz oryndap, shvetsııalyq qarsylasy Tobıas Harılanyń nokaýtyna ushyrady.
Jan Kenjebaev pen Shvetsııadan kelgen Aksel Karlson arasyndaǵy kúres te tartysty ótti. Úsh raýnd boıy qos palýan berispedi. Tóreshilerdiń pikiri ekige jarylyp, jeńis qazaqstandyqqa buıyrdy.
Meırambek Demeýbaev alǵashqy eki raýndta avstralııalyq Djozef Lýchanrǵa basymdyq berip, úshinshi raýndta ǵana óz sheberligin kórsete aldy. Biraq, tóreshilerdiń sheshimimen avstralııalyq jeńimpaz dep tanyldy.
Qazaqstandyq komandanyń jartylaı aýyr salmaq sanatyn Qudaıbergen Tóleýbaev túıindedi. Onyń jeńiske jetýge barlyq múmkindikteri boldy, alaıda tóreshilerdiń sheshimi basqa boldy. Sońynda, jeńis Imad Hoaektiń enshisine berildi.
Úsh kúndik saıystyń qorytyndysy boıynsha, Qazaqstan qorjynynda ázirge úsh qola medal bar. Bes sportshy MMA boıynsha Azııa chempıonatynyń altyny úshin baq synaıdy.
Aıta keteıik, 12-16 maýsym kúnderi Sıngapýrde UFC aptalyǵy aıasynda jaýyngerlik aralas jekpe-jekten Azııanyń ashyq chempıonaty ótip jatyr. Oǵan álemniń 15 elinen 66 sportshy qatysýda. Qazaqstan quramasynyń toǵyz jekpe-jekshisi segiz salmaq sanatynda el namysyn qorǵaýda.
