Bes qazaqstandyq álemniń eń baı adamdarynyń tizimine enip otyr
ASTANA. QazAqparat - AQSh-tyń tanymal Forbes iskerlik jýrnaly 2015 jyly naýryzdaǵy maǵlumattar boıynsha álemniń eń baı adamdarynyń tizimin jasaǵan bolatyn.
Reıtıngke qazaqstandyqtardyń ishinde bes azamat - Bolat Ótemuratov, Álıjan Ibragımov, Tımýr men Dınara Qulybaevtar, Vladımır Kım kirip otyr.
Eń baı qazaqstandyq dep QR Tennıs federatsııasynyń prezıdenti, kásipker Bolat Ótemuratov tanyldy. 57 jastaǵy kásipkerdiń baılyǵy shamamen 2,6 mlrd. dollarǵa teń. Byltyr onyń qarajaty 2,2 mlrd. dollarǵa teń bolatyn. Jalpy tizimde Ótemuratov 714-orynda tur. Ótemuratovtyń eń birinshi iri jobasy - «ATF Bank» kompanııasy boldy. Ony kásipker Italııanyń UniCredit kompanııasyna satyp, mol tabys tapty. Keıin mıkronesıeler beretin Kassa Nova men kásipkerlerge qyzmet isteıtin ForteBank bankterin ashty. Byltyr mıllıarder «Samuryq-Qazyna» qorynan Temirbank jáne Alıansbank banktarynyń belgili kólemdegi aktsııalaryn satyp alǵan bolatyn. Sonymen qatar Bolat Ótemuratovtyń ıeliginde Qazaqstanda jáne ózge de elderde qonaqúıler jelisi bar.
Qazaqstandyq mıllıarderlerdiń ekinshi ornyn álemniń eń iri óndirýshilerdiń biri ENRC kompanııasynyń aktsıoneri jáne «Eýrazııalyq bank» AQ Álıjan Ibragımov ıelendi. Ken óndirý arqyly baıyǵan kásipkerdiń bar baılyǵy 2,2 mlrd. dollarǵa baǵalanǵan. 2014 jyly bul kórsetkish 1,7 mlrd. dollar shamasynda boldy. Forbes tiziminiń jalpy reıtıngisinde ol 847-orynda.
Al Qulybaevtar januıasy 894-orynǵa jaıǵasqan. Olardyń árqaısysynda 2,1 mlrd. dollardan bar. Byltyr olardyń baılyǵy 1,8 mlrd. dollarǵa baǵalanǵan bolatyn. Jýrnal olardyń qyzmet salasyn bank isi dep kórsetken. Dınara Qulybaeva Qazaqstannyń halyq banki kompanııasynyń aktsıoneri ekeni belgili. Tımýr Qulybaev bolsa, Qazaqstannyń munaı-gaz sektorynda iri oıynshylardyń biri. Ol Reseıdiń eń iri munaı-gaz kompanııasy - «Gazpromnyń» dırektorlar keńesiniń múshesi, «KAZENERGY» qaýymdastyǵynyń, Qazaqstan kásipkerler palatasynyń Prezıdıým basshysy jáne Qazaqstan boks federatsııasynyń prezıdenti bolyp tabylady.
Mys magnaty Vladımır Kım 1,8 mlrd. dollarmen kósh sońyn túıindedi. Ol jalpy reıtıngte 1054 orynda tur. Qazirgi ýaqytta V.Kım KAZ Minerals kompanııasynyń (burynǵy «Qazaqmys») majorıtarly aktsıoneri.
