Bes qabatqa — jalǵyz kir mashına: Taraz stýdentteri jataqhanadaǵy kisi tózgisiz jaǵdaıǵa shaǵymdandy
TARAZ. KAZINFORM — Áleýmettik jelilerdiń birinde M. H. Dýlatı atyndaǵy Taraz óńirlik ýnıversıtetiniń stýdentteri bilim ordasyna qarasty № 1 jataqhanaǵa shaǵymdanǵan vıdeosy tarady.
Stýdentterdiń aıtýynsha, bes qabatty jataqhanada nebári 1 ǵana kir jýǵysh mashınasy bar. Onyń ózi eski bolǵandyqtan kıimdi taza jýmaı, qaıta jýýǵa týra keletin kórinedi.
Stýdentterdiń jýynatyn jeri de máz emes. Olardyń sózine súıensek, eki aı boıy jataqhana dýshyn paıdalana almaı keledi.
Atalǵan máselege baılanysty ýnıversıtettiń ınfraqurylymdy damytý jónindegi prorektordyń mindetin atqarýshy Seıitjan Orynbaev túsinik berdi.
«20-21 sáýir kúnderi ýnıversıtettiń tehnologııalyq kesheniniń № 1 jataqhanasynda jáne 27-28 sáýir kúnderi pedagogıkalyq kesheniniń № 3 jataqhanasynda da zalalsyzdandyrý jumystary tolyǵymen júrgizildi. Osy rette stýdentterdiń densaýlyǵynyń qaýipsizdigin qamtamasyz etý maqsatynda dezınfektsııa jumystaryn júrgizý barysynda tehnologııalyq keshenniń № 1 jataqhanasynan № 3 jataqhanasyna jáne № 3 jataqhanadan № 1 jataqhanaǵa ýaqytsha 2 kúnge kóshirilgen bolatyn. Osy oraıda, jataqhanalardaǵy tósek jabdyqtaryn tolyǵymen jýý jumystary atqarylyp, № 3 jataqhana stýdentteri kóshirilgendikten, stýdent sanynyń artýyna baılanysty kir jýý jumysy da kóbeıdi», — deıdi ol.
Seıitjan Orynbaevtyń aıtýynsha, kir jýǵysh mashınalarynyń eskirýine oraı jeke kásipkerlermen kelisimshart jasalyp, jataqhanaǵa qoıylatyn qosymsha 10 jańa úlgidegi kir jýǵysh mashınasy ýnıversıtet qoımasyna kelgen.
Alynǵan kir jýǵysh mashınalaryn ornatý úshin tıisti montajdaý jumystary júrip jatyr.
Sonymen qatar, ýnıversıtettiń barlyq jataqhanalaryndaǵy jýynatyn bólmelerdegi dýsh kabınkalaryndaǵy dýsh bólgishteri ornatylyp, barlyǵy tolyqtaı jumys istep tur.
«Qalalyq jylý júıesi arqyly beriletin jyly sý toqtatylǵannan keıin jataqhanalardaǵy arıstondar iske qosylyp, paıdalanylyp otyr. Jataqhanalardyń jýynatyn bólmelerinde 200 lıtrlik 2 danadan arıstondar ornatylǵan, ıaǵnı ár dýshqa 400 lıtrlik arıston arqyly jyly sý beriledi. Sondaı-aq stýdentter kóp jaǵdaıda arıstondardaǵy sýdy jıi ashyq qaldyryp, tıimdi paıdalanbaýyna oraı, arıston ýaqytyly sýdy jylytyp úlgermeı jatady», — dedi.