Bes ınstıtýtsıonaldyq reforma Qazaqstannyń álemniń damyǵan elderiniń qataryna kirýine septigin tıgizedi - Q. Jaqypov
Astanada ótip jatqan Qazaqstan halqy Assambleıasynyń 20 jyldyǵyna arnalǵan «Qazaqstandyq jol: Birlik. Patrıotızm. Reformalar» atty halyqaralyq konferentsııada sóz sóılegen Parlament Májilisiniń spıkeri Qabıbolla Jaqypov osylaı málimdedi.
Májilis spıkeriniń sózine qaraǵanda, qazaqstandyq jolǵa negizinen udaıy damý, reformalardy jalǵastyrý, jalpyálemdik tendentsııa aıasynda jetile túsýge umtylý dúnıeleri tán bolyp tabylady. Osy baǵytta Qazaqstan memlekettik qurylymnyń jańa kezeńine de qadam basyp otyr, bul Elbasy usynyp, prezıdenttik saılaýda barsha halyqtyń qoldaýyna ıe bolǵan bes ınstıtýtsıonaldyq reformamen tyǵyz baılanysty.
«Elbasy aıqyndaǵan bul reformalar memlekettik basqarýdy jetildirýge, zańnyń ústemdigine, ekonomıkalyq ósimdi yntalandyrýǵa, qazaqstandyq birtektilikti nyǵaıtýǵa, sonymen birge memlekettiń transpapernttiligi men eseptiligin arttyrýǵa baǵyttalǵan. Reformany júzege asyrý úshin «100 naqty qadam» Ult jospary da bekitildi. Jalpylama alǵanda, bundaǵy áńgime eń aldymen merıtokratııa qaǵıdattary boıynsha joǵary kásibı memlekettik apparatty qalyptastyrý jáne memlekettik qyzmet júıesin reformalaý týraly bolyp otyr. Ekinshi blokta, sot júıesi men quqyq qorǵaý organdarynyń tıimdiligi men ashyqtyǵyn arttyrý jolymen zańnyń ústemdigin qamtamasyz etý mindeti júkteldi. Sot júıesin reformalaý aıasynda ınvestıtsııalyq daýlardy sheshýdiń ashyqtyǵyn qamtı otyryp, biz sheteldik ınvestorlardyń senimdiligin kótere túsemiz», - dedi Q. Jaqypov.
Májilis Tóraǵasynyń aıtýynsha, osyndaı aýqymdy reformalardy júzege asyrý eń aldymen halyq birligi, onyń sanaly eńbegi men qazaqstandyq patrıotızmi arqasynda ǵana oryn alady.
«Mundaı reformanyń barlyǵy elimizdiń odan ári damýyna, tıimdi ekonomıkalyq, saıası júıeni qalyptastyrýǵa baǵyttalady ári osy arqyly Qazaqstannyń álemdik meılinshe damyǵan memleketteriniń qataryna enýi qamtamasyz etiledi», - dedi Q. Jaqypov.
