Bes birdeı oblys ormanshylardyń aılyǵyn kótere almaı otyr – Depýtat saýaly
ASTANA. KAZINFORM – Májilis depýtaty Nartaı Sársenǵalıev Premer-mınıstrdiń birinshi orynbasary Roman Sklıarǵa ormanshylardyń aılyǵy týraly depýtattyq saýal joldady.
«2024 jyldyń 1 shildesinde Premer-Mınıstr Oljas Bektenov elimizdegi orman sharýashylyǵy jáne tabıǵatty qorǵaý mekemeleri qyzmetkerleriniń laýazymdyq jalaqylaryna ústemaqy qosý týraly qaýlyǵa qol qoıdy. Orman jáne tabıǵatty qorǵaý uıymdary qyzmetkerlerine eńbekaqy tóleý júıesin, sharttary men mólsherlerin jetildirý maqsatymen «Azamattyq qyzmetshilerge, memlekettik bıýdjet qarajaty esebinen qarjylandyrylatyn uıymdardyń qyzmetkerlerine eńbekaqy tóleý júıesi týraly» Úkimet qaýlysyna ózgerister engizildi. Qujatqa sáıkes, orman órtin sóndirý beketteriniń, orman sharýashylyǵy mekemeleriniń, qorshaǵan ortany qorǵaý jáne orman ornalastyrý uıymdarynyń qyzmetkerleri laýazymdyq jalaqylaryna 100 paıyzǵa deıin ósimaqy alýy kerek edi», - deıdi depýtat.
Onyń sózinshe atalmysh qujattar orman órtin sóndirýshilerdiń, órt sóndirý kóligin júrgizýshilerdiń, traktorshylar, radıo operatorlarynyń, órt sóndirý mashınalary men apparattaryn jóndeıtin sheberlerdiń, baqylaý munarasyn baqylaýshylardyń aılyǵyn kóterýge negiz bolýǵa tıis edi.
«Atalǵan qaýly Qyzylorda oblysynda, Aral aýdanynda, Pavlodar, Mańǵystaý, Qostanaı, Jetisý oblystarynda oryndalmady degen derek keldi. Ormanshylardyń jazǵan aryzy qolymda. Ormanshylardyń jalaqysyn kóterýdiń júgi jergilikti bıýdjetke artylypty, olarda qarjy joq eken. Saldary aýyr, jalaqynyń tómendiginen jastar ormanshy bolyp qyzmetke barǵysy kelmeıdi. Orman bar, oryn bos, jalaqy jetpeıdi. Joǵaryda aıtylǵan máselelerdi zerdelep, 2024 jyldyń 1 shildesinde qol qoıylǵan qaýlynyń tolyqqanda oryndalýyn qadaǵalap, Qazaqstandaǵy orman sharýashylyǵyndaǵy mamandardyń laýazymdyq jalaqylaryna 100 paıyzdyq ósimaqynyń qosylýyn qamtamasyz etýińizdi suraımyn», - dedi Nartaı Sársenǵalıev.
