Bes birdeı aýyl ákiminiń ústinen qylmystyq is qozǵaldy
ASTANA. QazAqparat - Batys Qazaqstan oblysy Jánibek aýdanynyń prokýratýrasymen 5 aýyldyq okrýgteri ákimderiniń tarapynan jalǵan aktiler arqyly bıýdjettik qarajatty ysyrap etý faktileri anyqtaldy. Bul týraly oblystyq prokýratýranyń baspasóz qyzmetinen habarlady.
«2013 jyldyń qarasha aıynda Uzynkól, Aǵoba, Talovka, Borsy jáne Jaqsybaı aýyldyq okrýgteriniń ákimderi atalǵan okrýgterdiń (Uzynkól aýyly 170 myń teńge somaǵa, Aǵoba aýyly - 170 myń teńge somaǵa, Talovka aýyly - 150 myń teńge somaǵa, Borsy aýyly -170 myń teńge somaǵa jáne Jaqsybaı - 150 myń teńge somaǵa) eldi mekenderindegi joldardy jóndeý qyzmetteri men jumystaryn memlekettik satyp alý týraly «JánibekStroıServıs» JShS-men kelisim-shart jasasqan. Alaıda, prokýrorlyq tekseris barysynda atalǵan jumystardyń merdigermen oryndalmaǵany, biraq oryndalǵan jumystar retinde aktilerge aýyl ákimderiniń qol qoıylǵandyǵy anyqtaldy. Bul rette jalpy somasy 810 000 teńge bıýdjettik qarajat «JánibekStroıServıs» JShS shotyna aýdarylǵan», - delingen baspasóz baıanynda. Anyqtalǵan faktiler boıynsha materıaldardy aýdan prokýratýrasy protsessýaldyq sheshim qabyldaý úshin oblystyq Ekonomıkalyq qylmysqa jáne sybaılas jemqorlyqqa qarsy kúres departamentine joldanǵan bolatyn. Departament aýyldyq okrýg ákimderine qatysty QR Qylmystyq kodeksiniń 314-babynyń 3-bóligi (qyzmettik jalǵandyq jasaý) boıynsha sybaılas jemqorlyq qylmystyq is qozǵaǵan.
