Bes aıda elimizde bir teraktyń aldy alynyp, ekstremızm úshin 26 adam sottalǵan
ASTANA. KAZINFORM — Ulttyq qaýipsizdik komıtetiniń tóraǵasy Ermek Saǵymbaevtyń basshylyǵymen terrorızmge qarsy ortalyqtyń kezekti otyrysy ótti.
Jıynda sheteldik radıkaldardyń ený qaýpin joıý, ekstremızm men terrorızmniń aldyn alý, sondaı-aq osal obektilerdi terrorızmge qarsy qorǵaý máseleleri qaraldy.
Ekstremızm men terrorızmge qarsy is-qımyl salasynda qoıylǵan mindetterdi iske asyrý barysy týraly mádenıet jáne aqparat, týrızm jáne sport, aǵartý mınıstrlikteriniń jáne birqatar óńirlerdiń basshylary tyńdaldy.
Otyrysta eldegi mańyzdy qoǵamdyq-saıası is-sharalardyń qaýipsizdigin qamtamasyz etý sheńberinde memlekettik organdardyń ózara is-qımylyn kúsheıtý sharalary talqylandy.
Jyldyń basynan beri Qazaqstanda 1 terrorlyq shabýyldyń aldyn alyp, 26 adam terrorıstik jáne ekstremıstik qyzmeti úshin sottalǵan.
Ekstremızm men terrorızmge qatysy bar 151 sheteldik azamattyń elge kirýine jol berilmedi.
Respýblıkaǵa tyıym salynǵan dinı ádebıetterdi ákelgeni úshin 19 sheteldik jaýapqa tartyldy.
Sondaı-aq 356 terrorızmge qarsy oqý is-sharasy ótkizildi.
ІІM jáne UQK kúshimen terrorıstik turǵydan osal obektilerdi, onyń ishinde adam kóp jınalatyn oryndar 3 myńnan astam márte tekserildi.
Otyrys qorytyndysy boıynsha ekstremızm men terrorızmge qarsy is-qımyldyń jalpymemlekettik júıesin odan ári jetildirýge baǵyttalǵan naqty sheshimder qabyldandy.
