Bes aıda balalarǵa qarsy 83 zorlaý jáne 11 ólim deregi tirkeldi

ASTANA. QazAqparat – Bıyl qańtar-mamyr aılarynda kámeletke tolmaǵandarǵa qatysty 1080 quqyq buzýshylyq tirkeldi. Bul ótken jylmen salystyrǵanda 7,6%-ǵa artqan, dep habarlaıdy QazAqparat Ranking.kz resýrsyna silteme jasap.

Elimizde bıylǵy bes aıda 1008 quqyq buzýshylyq qylmys jáne 72-i – zańǵa qaıshy áreket. Qylmystardyń deni ortasha aýyr - 364 jaǵdaı. Sonymen qatar 252 aýyr qylmys, 198 asa aýyr, odan bólek aýyr emes 194 qylmys tirkeldi.

Ótken jyldyń alǵashqy 5 aıynda kámeletke tolmaǵandarǵa qatysty 1 004 quqyq buzýshylyq jasaldy. Bul onyń aldyńǵy jylmen salystyrǵanda 4,6%-ǵa az.

Óńirler boıynsha eń kóp quqyq buzýshylyqtar Túrkistan oblysynda tirkeldi. Jyl ishinde 100 quqyq buzýshylyq bolǵan. Odan ári quqyq buzýshylyqtardyń aıtarlyqtaı sany Almatyda (89 jaǵdaı, jylyna 15,6%) jáne Almaty oblysynda (86 jaǵdaı, 23,2%) jasalǵan.

Eń az quqyq buzýshylyq áreketi Ulytaý oblysy (15 jaǵdaı), SQO (26 jaǵdaı) jáne Pavlodar (33 jaǵdaı) oblystarynda baıqaldy.

Balalarǵa qatysty quqyq buzýshylyqtardyń kóp ósýi Mańǵystaý oblysynda (jylyna birden 67,6%-ǵa, 57 jaǵda»), al azaıý faktisi Pavlodar oblysynda (29,8%-ǵa) tirkeldi.

Kámeletke tolmaǵandarǵa qarsy quqyq buzýshylyqtyń kóbisi jeke basqa qarsy qylmys túrine jatady. Bıyl qańtar-mamyrda 556 jaǵdaı tirkelip otyr.

Sondaı-aq jeke múlik quqyq buzýshylyǵy (205 quqyq buzýshylyq, bir jyl ishinde 9,6%) jáne kólik qylmystary (165 quqyq buzýshylyq, 17,9%).

Quqyq buzýshylyqtyń saldarynan kóbine on alty jasqa tolmaǵan jasóspirimder zardap shekken. 158 jynystyq qatynas faktisi tirkeldi. Odan ári jol qozǵalysy erejelerin buzý (158 jaǵdaı) sııaqty balalar zardap shekken quqyq buzýshylyq tirkeldi. Sonymen qatar kámeletke tolmaǵan balalar men jasóspirimderge qatysty zorlaý, urlyq, jynystyq sıpattaǵy zorlyq-zombylyq áreketteri, buzaqylyq pen balalardy joldan taıdyrý jaǵdaılary tirkeldi.