Bes aıda 150 myńnan astam aýyl halqy statsıonardy erkin tańdaý quqyǵyn paıdalandy

Bul týraly búgin QR Densaýlyq saqtaý mınıstrliginde ótken alqa májilisinde belgili boldy.

Vedomstvo baspasóz qyzmetiniń habarlaýynsha, Biryńǵaı ulttyq densaýlyq saqtaý júıesi engizile bastaǵan ýaqyttan beri aýyldyń densaýlyq saqtaý salasyn qarjylandyrý kólemi 30 mlrd. teńgeden 45 mlrd. teńgege deıin artty. Jalaqynyń ósýi men ındeksatsııany esepke alǵanda, ósim 52 paıyzdy qurady.

Sanıtarlyq avıatsııanyń respýblıkalyq úılestirý ortalyǵy 2012 jyldyń І jarty jyldyǵynda 350-den astam ushyrylym jasap, 460 naýqasqa der kezinde kómek kórsetti.

«Alqa májilisiniń qorytyndysy boıynsha qaýly qabyldanyp, onda mınıstrliktiń qurylymdyq bólimshelerine, komıtetterine, sonymen qatar óńirlik densaýlyq saqtaý basqarmalaryna aýyldardaǵy densaýlyq saqtaý nysandarynyń materıaldyq-tehnıkalyq bazasyn nyǵaıtý, aýyl halqyn, onyń ishinde qalalarǵa jaqyn ornalasqan eldi meken turǵyndaryn medıtsınalyq jáne ambýlatorııalyq kómekpen qamtamasyz etý, naýqastarǵa ýaqytynda jedel medıtsınalyq kómek kórsetý maqsatynda kórshi oblystar arasynda ózara kelisim jasaý qajettigi  atap kórsetildi», - delingen habarlamada.