Bes aıda 1,2 mıllıonnan astam qazaqstandyq Ózbekstanǵa saıahattap barǵan
TAShKENT. KAZINFORM – Bıyl bes aıda Ózbekstanǵa 5,3 mıllıonnan astam sheteldik týrıst saıahattap keldi, dep habarlaıdy Kazinform agenttiginiń Tashkenttegi menshikti tilshisi.
Ózbekstan Ulttyq statıstıka komıtetiniń málimetinshe, 5 aıda sheteldik týrısterdiń sany 27,3%-ǵa ósti. Saıahatshylardyń kóbi Qyrǵyzstan (1,5 mln adam), Qazaqstan (1,2 mln adam) jáne Tájikstannan (1,2 mln adam) kelgen.
Sondaı-aq, Reseı (465 myń adam), Aýǵanstan (198 myń adam) jáne Qytaı (178 myń adam) azamattarynyń úlesi basym.
Komıtettiń málimetinshe, saıahatshylardyń kóbi Tashkent, Samarqand, Buhara jáne Hıýa qalalarynyń kórikti jerlerin aralaǵan.
Qosa ketsek, taıaýda Ózbekstan Memlekettik keden komıtetiniń Strategııalyq josparlaý jáne kedendik rásimderdi ońtaılandyrý basqarmasynyń bastyǵy Farhod Olımjonov Kazinform agenttigine suhbat berip, saıahatshylar qaperde ustaýy tıis erejelerdi aıtqan edi.
Sondaı-aq, bıyl naýryzda Qazaqstan men Ózbekstan shekarasynda ornalasqan «Atameken - Syrdarııa» kedendik baqylaý beketi jóndeýden keıin qaıta ashyldy.
Buǵan deıin habarlaǵanymyzdaı, Centrum Air áýe kompanııasynyń ushaqtary 13 maýsymnan beri «Tashkent - Qostanaı - Tashkent» baǵyty boıynsha reıs oryndap jatyr.
