Bes aı ishinde brakonerler júzge tarta kıikti óltirgen - AShM

ASTANA. QazAqparat - 2016 jyldyń bes aıynda Qazaqstanda brakonerler júzge tarta kıikti óltirgen. Al, sáýir-mamyr aılarynda júrgizilgen áýe sanaǵynyń qorytyndysyna qarasaq, Qazaqstanda 108 300 kıik, Qazaqstandaǵy kıikterdiń «atamekeni» Ústirt taralymynda nebary 1900 kıik qalǵan.

«Brakonerlik Qazaqstanda azaıǵan joq. 2016 jylǵy bes aıdyń ózinde  kıik atýǵa qatysty 33 fakt tirkelip otyr. Jyl basynan beri ustalǵan brakonerler júzden astam kıikti óltirgen. Zańsyz tasymaldanǵan myńnan asa múıiz tárkilendi», - dep habarlady búgin Aýyl sharýashylyǵy mınıstrliginde ótken brıfıng barysynda AShM Janýarlar dúnıesi jáne ańshylyq sharýashylyǵy basqarmasynyń basshysy Baqytbek Dúısekeev.

Mamannyń aıtýynsha, shyǵys medıtsınasy atalyq kıiktiń múıizi san syrqatqa daýa dep esepteıdi eken. Sondyqtan, zańsyz kıik aýlap, onyń múıizin satyp, paıda kóretinder bar. Al, atalyq kıik azaıǵan soń, bókenderdiń kóbeıýi de toqtaıdy.

B.Dúısekeev atap ótkendeı, Aýyl sharýashylyǵy mınıstrligi Betpaqdala, Oral jáne Ústirt taralymdaryn kúzetý úshin qosymsha sharalardy qolǵa alady.