Bes aı habarsyz ketken azamat tabyldy - Almaty oblysy
TALDYQORǴAN. QazAqparat - Almaty oblysynyń polıtseıleri habarsyz ketken 27 jasar azamatty taýyp, otbasymen tabystyrdy. Qaratal aýdanynyń turǵyny 2019 jyldyń qazan aıynda úıinen shyǵyp, joǵalyp ketken, dep habarlaıdy QazAqparat tilshisi.
Úshtóbe qalasynyń 57 jastaǵy turǵyny 27 jasar ulynyń úıden shyǵyp joǵalyp ketkeni týraly aryzdanǵan. Er azamat psıhonevrologııalyq dıspanserde esepte turǵan. Tártip saqshylary adam joǵalý faktisi boıynsha is qozǵap izdeý jumystaryn bastap ketken. Іzdestirý sharalaryna eriktiler men basqa da ana qaıǵysyna beı-jaı qaraı almaǵan azamattar jumyldyryldy. Turǵylyqty mekeni boıynsha barlyq jer tekserilip, Úshtóbe qalasy mańyndaǵy basqa eldi mekender de qaraldy. Joǵalǵan adamnyń belgileri men sýretteri barlyq polıtsııa bólimderine taratyldy. Alaıda izdeý jumystary nátıjesiz boldy. Biraq jumysyn toqtatpaǵan polıtseıler jýyrda joǵalǵan azamattyń izine shyǵyp, Taldyqorǵan qalasyndaǵy ortalyq bazardan tapty. Oblystyq polıtsııa departamentiniń baspasóz qyzmetiniń málimetinshe, Qaratal aýdandyq polıtsııa bóliminiń kapıtany Amandyq Asylhanov habarsyz ketken azamatty Úshtóbe qalasyna jetkizip, anasymen qaýyshtyrdy. Ulynyń aman-esen tabylǵanyna qýanǵan ana izdeý jumystaryna atsalysqan azamattar men tártip saqshylaryna alǵysyn bildirdi.
