Bes áleýmettik bastamanyń júzege asyrylýyn qadaǵalaıtyn Qoǵamdyq keńes quryldy
Qoǵamdyq keńes 26 adamnan quralǵan. Onda jetekshi saıası partııalardyń basshylary, úkimettik emes uıymdar men Qazaqstan halqy Assambleıasynyń ókilderi, belgili qoǵam qaıratkerleri jáne sarapshy mamandar bar.
"Elbasynyń bul bastamalaryn tolyqqandy jáne sapaly oryndaý - memorgandar aldynda turǵan úlken mindet. Búginde iske asyrý boıynsha jumystar bastalyp ketti. Osy jumystardy qadaǵalaýdy Elbasy Nur Otan partııasyna tapsyrdy. Bul Keńestiń úsh basty mindeti bar - áleýmettik bastamalardyń júzege asyrylýyna qoǵamdyq monıtorıng júrgizip, turaqty baqylaýda ustaý, baǵdarlamanyń oryndalý barysy týraly halyqqa aqparat berip, túsindirý jumystaryn uıymdastyrý jáne Elbasy bastamalaryn júzege asyrý kezindegi máselelerdi anyqtap, tıisti memlekettik organdarǵa olardy sheshý joldaryn usyný", - dedi «Nur Otan» partııasy Tóraǵasynyń Birinshi orynbasary Máýlen Áshimbaev Bes áleýmettik bastamasynyń júzege asyrylýyn qadaǵalaıtyn Qoǵamdyq keńestiń alǵashqy otyrysynda.
Sondaı-aq, otyrys barysynda Qoǵamdyq keńestiń tóraǵasy men hatshysy taǵaıyndaldy.
"Munda birneshe partııa men qoǵamdyq uıymdardyń ókilderi otyrǵandyqtan, Qoǵamdyq Keńesti meniń basqarǵanym jón bolmaıdy. Sondyqtan, qurmetti áriptester, tóraǵalyqqa QR Parlamenti Senatynyń depýtaty Jumaǵulov Baqytjan Tursynulyn taǵaıyndaýdy usynamyn. Baqytjan Tursynulyn barshańyz jaqsy tanısyzdar. Onyń kásibıligi men uıymdastyrýshylyq qabileti, tájirbıesi men áleýmettik saladaǵy bilim kókjıegi bizdiń keńestiń jumysyn joǵary deńgeıde uıymdastyrýǵa múmkindik beredi", - dedi M. Áshimbaev.
M. Áshimbaevtyń usynysy biraýyzdan maquldandy jáne Baqytjan Jumaǵulov ózine senim bildirgeni úshin Keńes múshelerine alǵys bildirdi.
Qoǵamdyq keńestiń hatshysy laýazymyna Nur Otan partııasynyń hatshysy Farhat Shaımuratuly Qýanǵanov taǵaıyndaldy.
