Bes áleýmettik bastamany aýyl jastaryna naqty mysalmen túsindirý kerek - Muhtar Mankeev
Keńes tóraǵasy qoǵamda túrli ıgilikterge qol jetkize almaıtyn, negizinen qarttar men balalardan quralatyn álsiz toptardyń bar ekenin atap ótti.
«Ókinishke qaraı, búginde atalǵan álsiz toptar quramyna aýyl jastary, jumyssyz júrgen jastar da enip otyr. Bir kezderi «bazarda arba súırep júrgen jastar» uǵymy boldy. Prezıdent «aldymen ekonomıka, sodan keıin saıasat» dep beker aıtqan joq. Mine, qazirgi ýaqytta Qazaqstan ekonomıka men saıasattan keıin, áleýmettik memleket taqyrybyn qozǵap otyr. Bul bastamalar qoǵamnyń barlyq toptary, ásirese jastar qamtylatyn qozǵaýshy kúshke aınalýy tıis», - dedi M.Mankeev QR Din isteri jáne azamattyq qoǵam mınıstrligi uıymdastyrǵan Elbasy bastamalaryn talqylaýǵa arnalǵan jıynda.
Sondaı-aq, M. Mankeev aýyl jastary úshin paıdaly bastamalardy naqty mysaldarmen túsindirý qajettigin atap ótti.
«Qazirgi úgit-nasıhattar, ınfografıkalar, úndeýlerden aýyl jastaryna paıda joq. Olarǵa munyń barlyǵyn mysalmen kórsetý qajet. Máselen, ózderi tárizdi aýyl mektebinen túlep ushqan jas memlekettik grantpen joǵary oqý ornyna túsedi. Qoljetimdi jataqhanada turyp, oqýyn aıaqtaıdy jáne aýylyna oralady. Aýylda óz bilimin paıdalanyp, qoljetimdi nesıemen bıznes ashady jáne jetistikterge jetedi. Dál osylaı bastamalardy bir adamnyń ómir joly arqyly kórsetsek, olarda talpynys paıda bolady», - dep óz sózin túıindedi M. Mankeev.
