Bes áleýmettik bastama: Shaǵyn nesıeniń 85% Úkimet kepildendiredi
Bul týraly Halyqty jumyspen qamtý jáne eńbek naryǵyn damytý departamentiniń dırektory Jeńisbek Dýlatov Úkimet úıinde ótken baspasóz máslıhatynda málimdedi.
«Byltyr «QazAgroKepildik» AQ jáne «Damý» qory 414 nesıege kepildik bergen bolatyn. Bıyl bul jospar eki ese kóbeıip, Úkimet tarapynan 800 kepildik beriledi. Kepildik kólemi jalpy nesıeleý somasynyń 85 protsentin quraıdy. Máselen, bir mıllıon teńge nesıeniń 850 myń teńgesine Úkimet kepildik beredi, qalǵan 150 myń teńgege nesıe alýshy aýyldaǵy malyn, jerin nemese basqa bir jyljymaıtyn múlkin kepildikke qoıa alady», - dedi Jeńisbek Dýlatov Úkimet úıinde ótken baspasóz máslıhatynda.
Eske sala ketsek, Prezıdenttiń bes áleýmettik bastamasynyń biri «Shaǵyn nesıe berýdi kóbeıtý» dep atalady. Onda ózin-ózi eńbekpen qamtyǵan jáne jumyssyz turǵyndar arasynda jappaı kásipkerlikti damytý úshin jeńildetilgen shaǵyn nesıe beriledi.
2017 jyly jalpy somasy 32 mıllıard teńge bolatyn 7200 shaǵyn nesıe berildi. Alaıda, «Bastaý Bıznes» jobasy boıynsha bilim alǵan taǵy 5 myń adam óz isin bastaýǵa qajetti shaǵyn nesıelerdi ala almady. Sondyqtan, Elbasy 2018 jyly qosymsha 20 mıllıard teńge bólip, shaǵyn nesıelerdiń jalpy somasyn 62 mıllıard teńgege jetkizýdi tapsyrdy. Nátıjesinde shaǵyn nesıe alatyndardyń sany 2017 jylmen salystyrǵanda 2 esege artyp, 14 myń adamǵa jetetin bolady.