Bes adamnyń ómirin qıǵan jol apaty: Oqıǵa ornynan qashyp ketken kúdikti ustaldy
NUR-SULTAN. QazAqparat – Bıyl 30 qyrkúıek kúni elordada jantúrshigerlik kólik apatynan 5 adam mert boldy. Búgin atalmysh jaǵdaıǵa qatysty tergeý barysy aıtyldy, dep habarlaıdy QazAqparat tilshisi.
Ortalyq kommýnıkatsııalar qyzmetinde ótken baspasóz máslıhatynda bıyl 30 qyrkúıekte Nur-Sultan qalasynda kópirde bolǵan jol apatynyń mán-jaıyna qatysty saýal qoıyldy.
«Iá, atalǵan jol-kólik oqıǵasy qoǵamdy beıjaı qaldyrmady. Qazirgi tańda elordanyń polıtsııa departamenti qylmystyq is qozǵady. Naqty aıtqanda, Qylmystyq kodekstiń 345-babynyń 4-tarmaǵyna sáıkes jol erejesin buza otyryp, 2 nemese odan da kóp adamnyń ólimine sebep bolý jáne 347-baptyń 1-tarmaǵyna sáıkes oqıǵa ornynan ketip qalýǵa qatysty tergeý júrip jatyr. Apat ornynan qashyp ketken kúdikti ustaldy. Kúdikti dep tanylǵan 19 jastaǵy elorda turǵyny búginde 2 aıǵa ýaqytsha qamaýǵa alyndy. Jol apatynyń ýaqytyna kelsek, ol bizde naqty tirkelgen. Túngi saǵat 00:18-de bolǵan. Bul - bizdegi resmı derek», - dep jaýap berdi QR ІІM tergeý departamentiniń basshysy Sanjan Ábilov.
Eske sala ketsek, atalǵan jantúrshigerlik apat 30 qyrkúıek kúni túnde boldy.
«Toyota Camry» avtokóliginiń 19 jastaǵy júrgizýshisi Esil ózeninen ótetin kópirden Saraıshyq kóshesine qaraı júrip kele jatyp, jyldamdyq rejimin saqtamaǵan.
Saldarynan kólik júrgizýshisimen qatar taǵy 4 adam jan tapsyrdy.
