Bes adamdy óltirgen: AQSh sotyna Madýronyń ústinen azamattyq talap-aryz tústi
ASTANA. KAZINFORM – Venesýelanyń burynǵy prezıdenti Nıkolas Madýroǵa qatysty AQSh-ta sottan tys kisi óltirýlerge baılanysty azamattyq talap-aryz berildi, dep habarlaıdy Euronews.
Nıý-Iorktiń Brýklın federaldyq sotyna túsken 44 bettik talap-aryzda Madýro 2017-2020 jyldary Venesýeladaǵy FAES arnaıy jasaǵyna bes jas jigitti sottan tys óltirý týraly buıryq bergen dep kórsetilgen.
Talapkerlerdiń aıtýynsha, qaza tapqandar Madýro bıligi kezinde memlekettik kúshtik qurylymdardyń qolynan qaza bolǵan myńdaǵan adamnyń qatarynda bolǵan. FAES bólimshesi adam quqyqtaryn buzdy degen shaǵymdardan keıin, onyń ishinde BUU málimdemelerinen soń, 2021 jyly taratylǵan.
Qujatta arnaıy jasaq qyzmetkerleri turǵyndardyń úılerine tańerteń erte kelip, er adamdardy otbasylarynan bólip áketip, keıin atyp óltirgeni, al keıin bılik olardyń «quqyq qorǵaý organdaryna qarsylyq kórsetkeni» týraly resmı nusqa usynǵany aıtylǵan.
«Madýro FAES bólimshesin saıası qural ári qoǵamdy baqylaý tetigi retinde paıdalanyp, qarsylyqty kúshpen basyp-janshý, kedeı aýdandardy úreıde ustaý jáne saıası qarsylastaryn joıý úshin qoldandy», – delingen talap-aryzda.
Talapkerler Venesýelanyń sot júıesi bul qylmystarǵa kinálilerdi jaýapkershilikke tartýǵa múmkindik bermeıtinin alǵa tartyp otyr. Osyǵan baılanysty olar AQSh-tyń Azaptaý qurbandaryn qorǵaý týraly zańy negizinde moraldyq ótemaqy óndirip berýdi suraǵan.
Euronews málimetinshe, Nıkolas Madýro qazirgi ýaqytta Nıý-Iorkte esirtki saýdasyna qatysty qylmystyq is boıynsha sotty kútip otyr. Ol ózine taǵylǵan aıyptardy moıyndamaı, ózin «áskerı tutqynmyn» dep málimdegen.
The New York Times basylymynyń habarlaýynsha, Madýro bul is boıynsha memleket basshysy retinde ımmýnıtetke ıe ekenin dáleldeýge tyrysýy múmkin.
Aıta keteıik, Madýronyń jaqtastary Karakasta prezıdentti qaıtarýdy talap etti.
