«Bernlı» bapkeri Dastan Sátpaevqa qatysty «Chelsıdiń» sheshimine narazylyq bildirdi
ASTANA. KAZINFORM — «Bernlı» klýbynyń bas bapkeri Nıkkı Haıen qazaqstandyq shabýylshy Dastan Sátpaevtyń «Charltonǵa» qarsy matchqa ne sebepti qatyspaǵanyn túsindirdi, dep habarlaıdy INFORMSPORTS.
Bapkerdiń aıtýynsha, jas fýtbolshynyń alańǵa shyqpaýyna «Chelsı» klýbynyń sheshimi sebep bolǵan. Londondyq komanda «Bernlıdiń» medıtsınalyq shtabymen birlesip, Sátpaevtyń fızıkalyq jaǵdaıy men júktemesin baqylaýda ustap otyr.
Buǵan deıin «Ýotfordqa» qarsy kezdesýde qosalqy quramnan alańǵa shyqqan qazaqstandyq fýtbolshynyń kelesi matchqa qatyspaýy jankúıerler arasynda suraq týǵyzǵan edi.
Nıkkı Haıen bul jaǵdaıǵa qatysty pikir bildirdi.
— Joq, bizge ony alańǵa shyǵarýǵa ruqsat berilgen joq. Bul — «Chelsıdiń» sheshimi. Óıtkeni onyń buǵan deıin aýyr jaraqaty bolǵan. Olar bizdiń medıtsınalyq shtabpen birlesip, fýtbolshynyń júktemesin qadaǵalap otyr. Búgin onyń oınaýyna bolmaıtynyn habarlady, — dedi maman.
Sonymen qatar «Bernlı» bapkeri mundaı shekteýlerdiń ózin ashýlandyratynyn jasyrmady. Degenmen ol eki klýb arasyndaǵy kelisimniń talaptaryn oryndaýǵa mindetti ekenin atap ótti.
— Iá, bul jaǵdaı meni ashýlandyrady. Biraq munyń bári klýbtar arasyndaǵy kelisimniń bir bóligi. Eger fýtbolshy jaraqat alsa, onyń medıtsınalyq toby bizdiń mamandarmen birge jumys isteıdi. Biz mundaı talaptardyń bar ekenin aldyn ala bildik, — dedi Haıen.
Osylaısha, Dastan Sátpaevtyń oıyndarǵa qatysýy ázirge onyń densaýlyǵyna jáne «Chelsı» men «Bernlı» medıtsınalyq shtabtarynyń ortaq sheshimine baılanysty bolmaq.
Aıta ketelik Dastan Sátpaev «Bernlı» sapynda kelesi oıynyn qashan ótkizýi múmkin ekendigin jazǵan edik.
