Bernd Shtork fýtboldan Qazaqstan ulttyq quramasynyń bas jattyqtyrýshysy bolyp taǵaıyndaldy
ALMATY. Qańtardyń 16-sy. QazAqparat /Erbol Azanbek/ - Bernd Shtork fýtboldan Qazaqstannyń ulttyq quramasynyń bas jattyqtyrýshy bolyp taǵaıyndaldy. Onymen 1+1 nusqasy boıynsha kelisimshart jasaldy,
dep habarlaıdy QazAqparat Qazaqstan Fýtbol federatsııasyna (QFF) silteme jasap.
«Biz B.Shtorktiń jumysyna qanaǵattanamyz. Bizdiń jas qurama oıyn órnegin jetildirip keledi. Buǵan Horvatııa men Ýkraına quramalarymen álem chempıonatynyń irkteý týrnırinde bolǵan oıyndardy mysalǵa alsaq bolady. Shtork myrza ustanatyn fýtbol fılosofııasy zamanaýı aǵymdarǵa ábden sáıkes keledi. Bul bolashaqta bizdiń komandanyń damýyna yqpal etedi dep oılaımyn», deıdi QFF-nyń vıtse-prezıdenti Vıktor Katkov.
«Men Qazaqstannyń Fýtbol federatsııasymen áriptestigimdi jalǵastyratynyma qýanyshtymyn. Sońǵy jyldary biz belgili bir deńgeıde ilgerleýge qol jetkizdik. Qazaqstan quramasymen jumys, jergilikti jas fýtbolshylardy ósirý, Qazaqstan fýtbolynyń damýy, Eýropada qazaq fýtboly bedeliniń qalyptasýyn baqylaý men úshin óte qyzyqty. Bizdiń áriptestigimizdiń jemisti bolatynyna, quramanyń EURO-2012 irikteý týrlarynda jankúıerelerdi qýantatynyna senim bildirgim keledi», deıdi Bernd Shtork.
