Bernard Hopkıns Aıdar Sháribaevqa sáttilik tiledi
ASTANA. QazAqparat - Amerıkalyq áıgili kásipqoı boksshy Bernard Hopkıns qazaqstandyq sportshy Aıdar Sháribaev týraly pikir bildirdi, dep habarlaıdy «SPORTINFORM» SAA tilshisi Qazaqstannyń Diamond Ring promoýterlik kompanııasyna silteme jasap.
Hopkıns Aıdar Sháribaevtyń jekpe-jegine kommentator bolady. Salmaq ólsheý rásiminen keıin ol Sháribaev jáne onyń komandasymen kezdesti.
«Erteń búkil álemniń boks jankúıerleri Kalıfornııaǵa kóz tigedi. ESPN telearnasy arqyly efırge beriletini aldaǵy jekpe-jekterdiń mártebesin kórsetedi. Bul Sháribaev úshin úlken múmkindik. Endrı Kanchıo myqty qarsylasqa tap boldy. Sháribaev jeńis úshin sharshy alańǵa shyqpaq bolyp otyrǵanyna kóz jetkizdim», - deıdi Bernard Hopkıns.
53 jastaǵy Hopkıns kezinde orta jáne jartylaı aýyr salmaqta IBF, WBC, WBA, WBO chempıony bolǵan.
Hopkıns jáne AQSh-tyń bedeldi sport jýrnalısteriniń biri Bernardo Ocýna Golden Boy Promotions ótkizetin boks keshin júrgizedi. Onda Aıdar Sháribaev (7-0,6 KO) 8-shi jekpe-jegin ótkizedi.
Boks keshi Amerıkanyń Indıo qalasynda bolady. Aıqastyń tikeleı translıatsııasyn 13 sáýir kúni Astana ýaqytymen shamamen 08:00-den bastap Setanta Qazaqstan telearnasynan qaraýǵa bolady.
