Berlýskonı tórtinshi ret Italııa premeri bolýǵa árekettenbek
ASTANA. 9 jeltoqsan. QazAqparat - Sılvıo Berlýskonı 2013 jyly Italııanyń Premer-Mınıstri laýazymyna talasatynyn málim etti,
dep habarlaıdy lenta.ru saıty Reuters agenttigine silteme jasap.
"Men kókirektegi shermen qoǵamǵa qyzmet etý úshin qaıta oraldym, - dep málimdedi senbi, 8 jeltoqsan kúni 76 jastaǵy saıasatker. - Jáne bul qadamdy jasaýǵa meni jaýapkershilik sezimi ıtermeledi".
Bunyń aldynda Berlýskonı astyrtyn qarjylyq aıla-amaldary úshin bir jylǵa shartty túrde sottalǵan bolatyn. Buǵan qaramastan, ol saıasatta qalatynyn, alaıda eldiń bıligine endi talaspaıtyndyǵyn, óziniń "Táýelsiz halyq" atty konservatıvtik partııasyn parlamenttik saılaýda basqarmaıtyndyǵyn da habarlaǵan-dy.
Beısenbide, 6 jeltoqsanda "Táýelsiz halyq" Italııanyń qazirgi premeri Marıo Montıdi qoldaýdan bas tartty. Osylaısha, olar aldyn ala jalpyhalyqtyq saılaýdyń bolar ýaqytyn bir qadamǵa jaqyndatty.
Sılvıo Berlýskonı 1994-1995, 2001-2006 jáne 2008-2011 jyldar aralyǵynda úsh ret el premeri boldy. Ol Eýroaımaqtaǵy daǵdarysqa oraı, partııa ishilik yntymaqtyń buzylýy saldarynan laýazymynan ketken bolatyn. Ekonomıkany qutqarýǵa eshbir partııada joq Montıdiń tehnokrattyq úkimeti kiristi. Onyń jumysy 2013 jylǵy saılaýǵa deıin jalǵasady dep kelisilgen edi.
Montıdiń ekonomıkalyq saıasaty salyq pen jumyssyzdyq deńgeıiniń ósýine baılanysty ıtalıandyqtardyń belgili bir bóligine qatty jaqpaı otyr. Berlýskonı koalıtsııasy elektorattyń atalmysh ókilderinen qoldaý tabýdy kózdeıtin bolsa kerek. Associated Press agenttigi habarlaǵanyndaı, áleýmettik taldaý nátıjesi boıynsha "Táýelsiz halyq" saılaýshylardyń tek 15 paıyz daýysyna ıe bolýy múmkin. Al kósh basyna Montıdi qoldap kele jatqan Demokratııalyq partııa shyǵýy yqtımal.
Berlýskonıdiń saıasatqa qaıta oralýyna onyń isti bolyp jatqany da kedergi keltiretinin topshylaý qıyn emes. Sebebi sot bastapqyda eks-premerdi tórt jyl bas bostandyǵynan aıyrý týraly jáne úsh jyl memlekettik qyzmetti atqarýǵa tyıym salý jóninde úkim shyǵarǵan bolatyn. Alaıda Italııanyń raqymshylyq týraly zańyna sáıkes, onyń jazasy bir jylǵa deıin qysqartyldy. Biraq memlekettik laýazymǵa qatysty tyıym ózgertilgen joq. Zańgerler sot úkimin buzdyrý týraly shaǵym aryz berdi jáne ol qanaǵattandyrylǵan jaǵdaıda úkim tipti kúshine enbeı qalatyny túsinikti.
