Berlýskonı memlekettik qyzmetpen qoshtasatyn boldy
ASTANA. 20 qazan. QazAqparat - Mılan qalasynyń soty Italııanyń burynǵy premer-mınıstri Sılvıo Berlýskonıdiń aldaǵy eki jylda memlekettik qyzmet atqarýyna tyıym saldy.
Reuters agenttiginiń habarlaýynsha, sot Berlýskonıdi salyqqa qatysty alaıaqtyǵy úshin aıypty dep tanyǵan soń osyndaı sheshim shyǵarǵan.
Biraq Berlýskonı qazir senat múshesi bolǵandyqtan sot sheshimi kúshine dereý enbeıdi. Ol úshin áýeli parlament senaty ony óz qatarynan shyǵarý týraly máseleni daýys salyp, tıisti sheshim qabyldaýy tıis. Senat bul máseleni qarasha aıynda qaramaqshy.
Sot sheshimi Berlýskonıdiń ıeligindegi Mediaset holdınginiń salyqtan jaltarý isi boıynsha qabyldanǵan. 2012 jyly qazanda holdıng isiniń tergeý qortyndysyna oraı ony tórt jyl merzimge bas bostandyǵynan aıyrýǵa jáne on mıllıon evro aıyppul salý týraly sot úkimi shyqty. Ol joly Mılan soty Berlýskonıge bes jyl boıy memlekettik qyzmetpen aınalysýyna tyıym salǵan edi. Biraq keıin joǵarǵy sot sheshimniń bul bóligin qaıta qaraý týraly qaýly qabyldaǵan.
2006 jyly raqymshylyq týraly zańǵa sáıkes, sot úkim etken tórt jyldyq jaza merzimi qysqaryp, bir jylǵa tústi. Eks-premer egde jastaǵy adam bolǵandyqtan, Berlýskonı bir jyldyq jazany túrmede emes, úıqamaqta óteýi de múmkin, dep habarlaıdy «Azattyq».
