«Berlındegi Mustafa basyna nege eskertkish turǵyzbaımyz?» - respýblıkalyq basylymdarǵa sholý

Qazaq qoǵamyndaǵy ózekti máselelerdi kóterip, oqyrman kóńilinen shyǵyp júrgen «Alash aınasy» gazeti beısenbilik nómirinde de alǵan baǵytynan taımady. Basylymnyń búgingi sanynda «Berlındegi Mustafa basyna nege eskertkish turǵyzbaımyz?» degen taqyryppen materıal jarııalandy. Maqalada Alash jurty úshin aıanbaı eńbek etken, tirliginde týǵan ólkesin bılegen keńes ókimeti saıasatynyń tepkisinen batysty panalaýǵa májbúr bolǵan Mustafa Shoqaıǵa qurmet kórsetip, onyń basyna eskertkish ornatý qajettegi jazylǵan. «Bıyl Mustafa Shoqaıdyń týǵanyna 120 jyl, al kelesi jyly dúnıeden ozǵanyna 70 jyl tolady. Osy oraıda qazaqtyń qaıratker uly jerlengen jerge bir eskertkishin ornatý kerek», - delingen maqalady.

Osy basylymnyń turaqty «Dat!» aıdarynda Májilis depýtaty Zeınolla Alshymbaevpen bolǵan suhbat jarııalanǵan. Onda depýtat elimizdiń qazirgi ekonomıkalyq áleýeti men ekologııalyq problemalary týraly oılarymen bólisken. Halyq qalaýlysy, ásirese elimizdegi munaı óndirisindegi olqylyqtarǵa alańdaýshylyq bildiredi, Qazaqstannyń jerasty baılyqtaryn eń aldymen óz ıgiligimizge jaratýdy úırenýimiz kerektigin aıtady. Materıal «Ekologııalyq talapsyz «ekonomıkany damyttyq» dep aıqaı salýǵa esh quqymyz joq» degen taqyryppen berilgen. «Qazaqstan iri munaı óndiretin elge aınalyp kele jatyr. Sondyqtan munaı men gazdan túsip jatqan paıdany búgingi áleýmet qana emes, keleshek urpaq ta kórýge, sezýge tıis. Sol úshin búgingi kúni erteńgi máselelerdi oılap, munaı arqyly táýelsiz ekonomıkany damytý joldaryn qarqyndy júrgizýge tıispiz. Dál qazirgi kezde óz bolashaǵymyzdy ary qaraı qalaı damytýdyń tetigin qalap jatyrmyz. Sonymen qatar «munaıdyń da suraýy bar» ekenin esh esten shyǵarmaý kerek», - deıdi Z. Alshymbaev suhbatynda. Suhbattyń tolyq mátinin oqyǵyńyz kelse, gazettiń búgingi sanyn jiberip almańyz.

***
«El Parlamenti» araq-sharap saýdasyn qoǵamnan oqshaýlaý týraly Úkimetke usynyspen shyqty», - dep jazady «Aıqyn» gazeti búgingi nómirinde jaryq kórgen «Araq ataýlyny arnaıy dúkende satýdy usyndy» degen maqalasynda. Basylymnyń jazýynsha, tómengi palata depýtaty Ivan Chırkalın araq-sharapty tek beınequrylǵy ornatylǵan, arnaıy dúkende ǵana satý qajettigin aıtady. Sondaı-aq ol paıda tabý úshin alkogoldik ónimderdi satý erejelerin aıaqasty etýge baratyn, tipti araqty «aşy sýǵa» qumartqan balalarǵa da satýdan da tartynbaıtyn bıznesmenderdi qylmystyq qýdalaýdy usynǵan. Maqalanyń baıybyna barǵyńyz kelse, gazettiń beısenbilik nómirin qarańyz.

«Astana Sammıti - Qazaqstan tóraǵalyǵynyń iri jetistigi». Osyndaı taqyryppen «Aıqyn» gazetiniń búgingi nómirinde jaryq kórgen maqalaǵa elordada ótetin EQYU Sammıti arqaý bolǵan. «Qazaqstannyń EQYU-ǵa tóraǵalyq etýi, saıyp kelgende, EQYU tarapynan elimizdegi saıası jáne ekonomıkalyq damý baǵyty strategııasynyń durystyǵyn, sonymen birge EQYU-nyń basqa da múshelerine úlgi bolatyn turaqty jáne úılesimdi damý tájirıbesiniń qundylyqtaryn moıyndaý. Al Uıymnyń eń joǵary deńgeıdegi jıynyn ótkizýge biraýyzdan derlik kelisim berý - senim bildirgendik», - dep jazaby basylym.

**

«Keshe Astana ákimi Imanǵalı Tasmaǵambetovtyń qatysýymen qalalyq máslıhattyń kezekti sessııasy ótti. Kún tártibindegi negizgi másele qalalyq bıýdjettiń qarjysymen elordalyqtardy qosymsha dári-dármekpen qamtamasyz etý boldy», - dep jazady «Astana aqshamy» gazeti. Basylymnyń jazýynsha, qan men mıdyń qaterli aýrýyna shaldyqqandar tegin dári-dármek alatyn bolady. Sondaı-aq máslıhat depýtattary qalalyq densaýlyq saqtaý basqarmasynyń ambýlatorlyq jaǵdaıda mıeloleıkozben aýyratyndardy jergilikti bıýdjet esebinen «Nılotınıb» preparatymen qamtamasyz etý týraly usynysyn quptap, osy maqsatqa qajetti qosymsha 15 mln. teńgege jýyq qarjy bólý jóninde sheshim qabyldady.

Sondaı-aq osy basylymnyń búgingi nómirinen qala tirshiligine qatysty jaıttar qamtylǵan maqalalarmen egjeı-tegjeıli tanys bolasyzdar.

**
«Nur Astana» gazetiniń beısenbilik nómirinde L.Gýmılev atyndaǵy Eýrazııa ulttyq ýnıversıteti Jýrnalıstıka jáne saıasattaný fakýltetiniń dekany Namazaly Omashevtan alynǵan suhbat «Qazaq jýrnalıstıkasynyń jańa dáýiri bastaldy» degen taqyryppen berilgen. Barlyq saýaldarǵa tuşymdy jaýap berilgen suhbatty oqyǵyńyz kelse, basylym beısenbilik nómirin jiberip almańyz.