Berlındegi iri klınıkaǵa hakerler shabýyl jasap, jeke derekterdi urlady
ASTANA. KAZINFORM — Nemis tilindegi Charité ýnıversıtettik klınıkasynyń serverine hakerler shabýyl jasap, jeke baılanys derekterine qol jetkizgen. Bul týraly búgin klınıka ákimshiligi málimdedi, dep habarlaıdy BILD.
Kıbershabýyl saldarynan qaskóıler medıtsınalyq mekemeniń saıty ornalasqan serverge kirgen. Zardap shekkenderdiń qatarynda klınıka qyzmetkerleri, stýdentter jáne Charité mekemesine onlaın nysan arqyly, sonyń ishinde dáriger qabyldaýyna jazylý úshin júgingen bógde adamdar bolýy múmkin.
Ázirge naqty qandaı málimetterdiń urlanǵany jáne shabýyldan qansha adamnyń zardap shekkeni belgisiz. Klınıka ákimshiligi zardap shekkenderdiń barlyǵyna jaqyn arada jeke habar berýge ýáde etti.
Buzý faktisi anyqtalǵannan keıin mamandar oqıǵanyń sebepterin tekserýge kirisip, basqa aqparattyq júıelerdiń qorǵanysyn kúsheıtken.
Sonymen qatar Charité klınıkasy qadaǵalaý jáne quqyq qorǵaý organdarymen birlesip jumys istep jatyr. Ákimshiliktiń málimetinshe, kıbershabýylǵa qaramastan, naýqastarǵa medıtsınalyq kómek kórsetý toqtaǵan joq. Aýrýhana ádettegi rejımde jumys istep tur.
Ótken aptada da PHP júıesindegi osaldyq anyqtalǵandyqtan, Charité óz saıtyn ýaqytsha óshirgen bolatyn. Alaıda klınıka ókilderi jańa kıbershabýyldyń bul jaǵdaıǵa qatysy joq ekenin málimdedi.
Aıta ketelik Japonııalyq GMO Internet kompanııasy hakerlerdi tabýǵa 1 mln dollar syıaqy usynǵan edi.
