Berlındegi Brandenbýrg qaqpasynyń aldynda qazaq áni áýeledi
QYZYLORDA. KAZINFORM – Syrboıylyq ónerpazdar qazaq halqynyń baı mádenıeti men ulttyq ónerin halyqaralyq deńgeıde tanytý maqsatynda Germanııada júr.
Shyǵarmashylyq sapar barysynda olar el astanasy Berlın qalasyndaǵy áıgili Brandenbýrg qaqpasynyń aldynda qazaq mádenıetiniń baı murasyn nasıhattady.
- Ulttyq kıim kıgen ártister patrıottyq ánderdi áýelete shyrqap, sheteldik týrıster men qala turǵyndaryna qazaq halqynyń baı mádenı murasy men rýhanı qundylyqtaryn pash etti. Ásem án men ulttyq naqyshtaǵy óner kórsetilimi sheteldik kórermenderdiń nazaryn aýdaryp, olarǵa qazaq óneriniń ereksheligin sezinýge múmkindik berdi, - dep habarlady oblystyq Mádenıet, arhıvter jáne qujattama basqarmasy.
Bul – ulttyq ónerimizdi halyqaralyq deńgeıde dáriptep, Qazaqstannyń mádenı kelbetin tanytýǵa baǵyttalǵan mańyzdy qadam. Án arqyly eldiń rýhyn jetkizgen shyǵarmashylyq ujym qazaq mádenıetiniń órisin keńeıtip, ónerdiń ult pen ultty jaqyndastyratyn ortaq til ekenin taǵy bir márte dáleldedi.
Buǵan deıin Qazaqstannyń Frantsııadaǵy elshiligi jáne Qyzylorda oblysy ákimdiginiń qoldaýymen Parıjdegi ataqty dıplomatııalyq zaldardyń biri — Cercle de l’Union Interalliée ǵımaratynda Qyzylorda oblystyq fılarmonııasynyń kontserti ótti.
