Berlınde júk kóligi qalyń jurttyń arasymen júrip ótti: 9 adam qaza boldy
BERLIN. QazAqparat - Dúısenbi kúni Berlınde júk kóligi Braıtshaıdplats alańynda ornalasqan rojdestvolyq saýda bazaryna soǵyldy, dep habarlaıdy «QazAqparat» HAA-nyń menshikti tilshisi.
«Biz toǵyz adamnyń mert bolǵanyn rastaı alamyz, jaraqattanǵandar kóp. Bizdiń áriptester qazir Braıtshaıdplats alańynda», - dep jazdy polıtsııa qyzmeti Twitter-degi akkaýntynda. Kúsh qurylymdary barlyq nusqany qarastyrýda, sonyń ishinde lańkestik aktini de.
Oqıǵaǵa kýá bolǵandardyń aıtýynsha, júk kóligi búkil alań boıymen júrip ótip, shyrshanyń janyna kelip toqtaǵan.
Qazaqstan Respýblıkasynyń Germanııadaǵy Elshiligi zardap shekkenderdiń arasynda QR azamattary bar-joǵyn anyqtaý ústinde.
Birneshe saǵattan keıin Berlın polıtsııasy Twitter mıkroblogynda: «Kúdikti ustaldy. Qazir onyń júk kóliginiń tizgininde bolǵany, ne bolmaǵany anyqtalýda», - dep jazdy.
Internette oqıǵa ornynan túsirilgen alǵashqy vıdeolar paıda bola bastady.
