Berlınde Zelenskıı men AQSh delegatsııasynyń kelissózi ótip jatyr

ASTANA. KAZINFORM — Germanııa kantsleri Frıdrıh Merts Ýkraına prezıdenti Vladımır Zelenskıı men quramynda Djared Kýshner men arnaıy ókil Stıven Ýıtkoff bar AQSh delegatsııasyn Berlınde qabyldady, dep habarlaıdy DW.

dpa agenttiginiń habarlaýynsha, 14 jeltoqsan, jeksenbi kúni Merts federaldyq kantslerdiń keńsesinde ýkraınalyq kóshbasshyny qarsy alyp, keıin Vashıngton ókilderi kelgennen keıin kezdesý ótti.

Osydan keıin Zelenskıı men AQSh delegatsııasy arasyndaǵy kelissózder bastaldy, dep habarlaıdy Reuters agenttigi úkimettik derekterge silteme jasap. Kantsler kelissózge qatyspaǵanymen, syrtqy saıasat jónindegi keńesshisi Gıýnter Zaýtter (Günter Sautter) kelissózder bólmesinde boldy. Kantsler úsh kelissóz júrgizýshini jáne Ýkraına Ulttyq qaýipsizdik jáne qorǵanys keńesiniń hatshysy Rýstem Ýmerovti jeke qarsy aldy.

Buǵan deıin Zelenskıı Berlınde ýkraın, amerıkan jáne eýropalyq ókilderdiń qatysýymen birqatar kezdesý ótkizetinin habarlaǵan.

— Eń bastysy, men prezıdent Tramptyń ókilderimen kezdesemin, sondaı-aq eýropalyq áriptesterimizben jáne kóptegen kóshbasshylarmen beıbit sheshim — soǵysty toqtatý saıası sheshimi boıynsha kezdesýler bolady, — dep jazdy ol áleýmettik jelide.

Aıta keteıik, AQSh prezıdentiniń arnaıy ókili Stıven Ýıtkoff osy demalys kúnderi Berlınde Ýkraına, Germanııa, Frantsııa jáne Ulybrıtanııa lıderlerimen kezdesetinin jazǵanbyz.