Berlınde patrýldik qyzmet atqarǵan: Qyzylordalyq Tólegen Júnisov 103 jasqa toldy

QYZYLORDA. KAZINFORM - Jeńisten keıin Berlınde patrýldik qyzmet atqarǵan qyzylordalyq qart maıdanger Tólegen Júnisov bıyl 103 jasqa toldy.

Tólegen Júnisov 1921 jyly Qyzylorda oblysy, Tereńózek aýdany, Jańaryq aýylynda dúnıege kelgen. 1942 jyly qyzyl ásker qataryna qabyldanyp, kishi komandırler daıyndaıtyn kýrsta bilim alady. Ýkraınada №688 atqyshtar polkinde urysta bolǵan. Ýkraınany jaýdan azat etý jolynda erliktiń erekshe úlgisin kórsetti.

Beıbit kezeńde:Berlınge deıin jetken maıdanger jeńisten keıin elge qaıtarylmaı Berlınde qalyp, qala mańynda patrýldik qyzmet atqarady.

Ol kisi Reıhstagqa tý tigilgen sátti áli kúnge deıin umytpaıdy.

«Murjanyń túbindegi kesekter alynyp, sol jerde tý jelbiregende erekshe qýandyq. Biraq soǵan jetý úshin qanshama bozdaqtyń qany tógildi. Endi soǵys bolmasyn», - dedi qart maıdanger. 

1946 jyly elge oralǵan soń óz aýylynda beıbit eńbekke aralasady. Temirjol salasynda jol monteri bolady. Tozyǵy jetken shpaldardy aýystyrý, tóseý, shegendep qaǵyp, bekitý sekildi jumystarymen aınalysady. 

1983 jyly zeınet demalysyna shyqqanǵa deıin Qyzylorda belgi berý jáne baılanys dıstantsııasynda eńbek etedi. 

Jaýyngerlik erligi úshin maıdanger «І dárejeli Uly Otan soǵysy» ordeni, «Germanııany jeńgeni úshin», «Za boevye zaslýgı», «Za otvagý», «KSRO qarýly kúshterine – 60 jyl», «KSRO qarýly kúshterine – 70 jyl» jáne beıbit kúnderde «Eńbek ardageri», «Astanaǵa – 10 jyl» medaldarymen marapattalǵan.

Búginde aqsaqal - 2 qyz, 1 ulynan taraǵan 8 nemere, 2 shóbereniń atasy.

Aıta ketsek, Syr óńirinde Jeńistiń 79 kóktemin qarsy alǵan 4 maıdanger bar. Olardyń ishinde Tólegen Júnisov bıyl 103 jasqa tolsa, syrdarııalyq ıAhııa Tasyrov 102, Tileýbergen Tobabergenov pen qyzylordalyq Ábdrahman Baıtikov 100 jasqa keldi.

Eske salsaq, bıyl Qyzylorda oblysynda qart maıdangerlerge 2,5 mıllıon teńge berildi.