Berlınde qonaqúıdegi 16 metrlik akvarıým synyp ketti

ASTANA. QazAqparat – Berlınniń ortasynda ornalasqan Dom Aquaree qonaq úıinde 16 metrlik akvarıým synyp ketti. Akvarıýmda 1,5 myń teńiz janýary bolǵan. Eki adam zardap shekti, dep habarlaıdy QazAqparat Morgenpost basylymyna silteme jasap.

Twitterjelisine paıdalanýshylar oqıǵa ornynan túrli vıdeolar salyp jatyr.

Dom Aquaree qonaqúıi Berlınniń ortalyǵyndaǵy Karl-Lıbkneht-Shtrasse kóshesinde, Berlın Aleksanderplats alańy men áıgili telemunaranyń janynda ornalasqan.

Ol álemdegi eń úlken akvarıýmdardyń biri sanalaptyn. Onda 1,5 myń teńiz janýary men 1 mıllıon lıtr sý bolǵan.

Sý balyqtarmen birge kóshege aǵyp ketti.

Reuters agenttiginiń habarlaýynsha, oqıǵanyń sebebi áli anyqtalmaǵan. Alaıda aldyn ala boljam boıynsha oǵan materıaldardyń tozýy sebep bolǵan.

Qazir akvarıýmy bar qonaqúı turǵan kóshe jabyq.

Jolǵa kóp sý tógilgen. Oqıǵa ornynda apattyq-qutqarý qyzmetiniń 100 mamany jumys istep jatyr.

Qonaqúı qonaqtaryn evakýatsııalaý úshin arnaıy marshrýttyq avtobýstar uıymdastyrylǵan. Qazirgi ýaqytta Berlındegi aýa temperatýrasy -7°.

Basty foto: Keı Nıtfeld

Aqparat ishindegi foto Twitter paraqshasynan alyndy