Berlınde qoǵamdyq kólik qyzmetkerleri ereýilge shyqty

ASTANA.KAZINFORM  - Berlınde «Ver.di» kásipodaq uıymynyń bir kúndik eskertý ereýili bastalyp, metro poıyzdarynyń, tramvaılardyń jáne kóptegen avtobýstardyń qozǵalysy toqtatyldy, dep habarlaıdy DW.

Ereýildiń sebebi - Ver.di men Berliner Verkehrsbetriebe (BVG) arasyndaǵy jalaqyny kóterýge qatysty daý. Kásipodaq 16 myń qyzmetker úshin aı saıynǵy jalaqyny 750 eýroǵa kóterýdi talap etip otyr. Kelissózderdiń birinshi raýndynda kompanııa naqty usynystar jarııa etpegendikten, Ver.di BVG kompanııasyn aıyptady.

Berliner Verkehrsbetriebe jalaqyny kóterýdi prıntsıpti túrde oryndy dep sanaıdy. Biraq kásipodaqtyń naqty talaptaryn qarjylyq turǵydan shyndyqqa janaspaıdy dep qabyldamady.

Ereýil saldarynan qoǵamdyq kólikterdiń júrýine aıtarlyqtaı shekteý qoıyldy. Dúısenbi, 27 qańtarda dpa aqparattyq agenttiginiń habarlaýynsha, metro poıyzdarynyń, tramvaılardyń jáne kóptegen avtobýstardyń qozǵalysy ýaqytsha toqtatyldy.

Ver.di kompanııasynyń kelissóz júrgizýshisiniń aıtýynsha, qyzmetkerler saǵat 03:00-de jumysyn toqtatqan.

Ereýildiń jolaýshylarǵa áserin barynsha azaıtý úshin Malsdorf pen Lıhtenberg aýdandary arasyndaǵy S5 poıyzdary 09:00-den 14:00-ge deıin jıi júretin bolady, dep habarlady Deutsche Bahn.

Buǵan deıin Strasbýrgte frantsýz fermerleri Eýroodaq pen MERKOSÝR elderi arasyndaǵy saýda kelisiminiń jasalýyna narazylyq bildirip, Eýroparlament ǵımaratynyń aldynda ereýil uıymdastyrǵan bolatyn.