Berlınde Qazaqstannyń EQYU-ǵa tóraǵalyǵyna arnalǵan jıyn bolyp ótti
ASTANA. 27 qańtar. QazAqparat - 26 qańtar kúni Berlınde Qazaqstannyń Eýropadaǵy qaýipsizdik jáne yntymaqtastyq uıymyndaǵy tóraǵalyǵyna arnalǵan sımpozıým bolyp ótti.
Іs-shara Nemis halyqaralyq saıasat jáne quqyq odaǵynyń uıytqy bolýymen uıymdastyrylǵan, dep habarlaıdy QR Syrtqy ister mınıstrliginiń baspasóz qyzmeti.
Forým jumysyna qatysqan QR elshisi Nurlan Ońjanov óz sózinde jınalǵan qaýymdy Qazaqstannyń Uıymǵa tóraǵalyq etýiniń qorytyndylary men negizgi baǵyttary týraly, 2010 jyldyń 1-2 jeltoqsany kúnderi Astanada ótken EQYU Sammıtiniń nátıjeleri týraly, Astana Deklaratsııasy týraly, sonymen qatar Qazaqstannyń halyqaralyq bastamalary týraly habardar etti.
Pikir almasý barysynda Nemis halyqaralyq saıasat jáne quqyq odaǵynyń vıtse-prezıdenti Manfred Shıýneman etnıkaaralyq jáne konfessııaaralyq kelisimdi saqtaýdaǵy Qazaqstannyń biregeı tájirıbesin basa atap ótti. Ol el bıligi ustanyp otyrǵan durys saıasattyń arqasynda Qazaqstan Ortalyq Azııadaǵy turaqtylyq faktoryna aınalyp otyr degen oıyn jetkizdi.
