Berlınde Qazaqstan men Germanııa arasyndaǵy saıası konsýltatsııalar ótti
Qazaqstan Syrtqy ister mınıstriniń orynbasary Marǵulan Baımuhan jáne Germanııa Syrtqy ister mınıstrliginiń Shyǵys Eýropa, Ońtústik Kavkaz jáne Ortalyq Azııa memleketterimen yntymaqtastyq jónindegi ýákili Mıhael Zıbert jetekshilik etken kelissózder barysynda jyl ishindegi birlesken jumystyń nátıjeleri, ásirese Prezıdent Qasym-Jomart Toqaevtyń 2019 jyldyń jeltoqsanynda jáne 2020 jyldyń aqpanynda Germanııaǵa jasaǵan saparlary aıasynda qol jetkizilgen kelisimderdiń júzege asyrylýy talqylandy.
Konsýltatsııalar barysynda sondaı-aq eki memlekettiń BUU jáne ózge de halyqaralyq uıymdar sheńberindegi yqpaldastyq máseleleri talqylandy. Taraptar jaqynda EQYU-nyń basshylyq laýazymdaryna Qazaqstan men Germanııa úmitkerleriniń taǵaıyndalýy jóninde ózara quttyqtaýlarmen almasty: Qaırat Ábdirahmanov Az ulttar isteri jónindegi Joǵary komıssar, al Helga Shmıd Bas hatshy bolyp saılandy. Suhbattasýshylar sondaı-aq Qazaqstan men Eýropalyq Odaq arasyndaǵy keńeıtilgen áriptestik pen yntymaqtastyq týraly kelisim men Germanııanyń «Jasyl Ortalyq Azııa» bastamasyn júzege asyrý boıynsha pikir almasty.
COVID-19 pandemııasyna qaramastan qazaqstandyq jáne german seriktesteriniń tikeleı jáne qashyqtyqtan jemisti qarym-qatynas ornatyp jatqanyna qanaǵattanýshylyq bildirilip, Qazaqstan Úkimetiniń german ınvestorlarymen jumys jónindegi Jumys tobynyń, Qazaqstanda turatyn etnıkalyq nemister jónindegi úkimetaralyq komıssııanyń, saýda-ekonomıkalyq yntymaqtastyq jónindegi úkimetaralyq jumys tobynyń, Qazaqstan-German iskerlik keńesiniń jáne Berlın eýrazııalyq klýbynyń ekijaqty yntymaqtastyqty damytýǵa qosyp jatqan eleýli úlesi atap ótildi. Mádenı-gýmanıtarlyq jáne bilim berý salalaryndaǵy árekettestikti nyǵaıtýdyń mańyzdylyǵy qaıta qýattaldy.
Kelissózderge qatysqan Qazaqstannyń Germanmıadaǵy Elshisi Dáýren Káripov jáne «Kazakh Invest» UK» AQ Basqarma tóraǵysynyń orynbasary Ǵalym Ózbekov memleketimizdegi ınvestıtsııalyq múmkindikter men onyń osy saladaǵy saıasaty týraly baıandady.
Konsýltatsııalar qorytyndysymen taraptar ekijaqty yntymaqtastyqtyń kóptegen salalary boıynsha qyzmetti jalǵastyrýǵa ýaǵdalasty.
Sondaı-aq Berlınde M. Baımuhan Reseı, Ortalyq Azııa elderi jáne «Shyǵys seriktestikpen» qoǵamaralyq yntymaqtastyq jónindegi Germanııa úkimetiniń Úılestirýshisi, Býndestag depýtaty Iohann Zaathoffpen kezdesti. Suhbattasýshylar Qazaqstanda jáne Germanııada ótetin aldaǵy is-sharalar kúntizbesin, onyń ishinde 2021 jyldyń 10 qańtaryndaǵy Parlament Májilisi depýtattaryn saılaýy jáne 26 qyrkúıegindegi Germanııadaǵy federaldyq saılaýǵa daıyndyq taqyryptaryn da qozǵady.
Otandyq dıplomat elimizdegi aýqymdy saıası jáne demokratııalyq reformalardyń, sondaı-aq «halyq únine qulaq asatyn memleket» tujyrymdamasynyń júzege asyrylýynyń barysy jóninde maǵlumat berdi. Óz kezeginde I. Zaathoff Qazaqstandaǵy demokratııalandyrýǵa baǵyttalǵan ózgeristerge jáne partııalar arasyndaǵy saıası básekelestiktiń artýyna jáne Májilistiń jańartylǵan quramymen jemisti qarym-qatynasty jalǵastyrýǵa shynaıy qyzyǵýshylyǵyn bildirdi.
