Berlınde Qazaqstan kınosy kúnderi ótti

ASTANA. KAZINFORM – Germanııa astanasy Berlınde Qazaqstan kınosy kúnderi uıymdastyrylyp, nemis kórermenderine «Qazaq handyǵy. Almas qylysh» jáne «Jeruıyq» kórkem fılmderi usynyldy, dep habarlaıdy Mádenıet jáne aqparat mınıstrligi.

v
Foto: Mádenıet jáne aqparat mınıstrligi

Mádenı is-shara aıasynda qazaqstandyq kınematografııanyń tarıhı taqyryptardy arqaý etken eki týyndysy kórsetildi.

Qazaqstan kınosy kúnderiniń ashylýynda Qazaqstan Respýblıkasynyń Germanııa Federatıvtik Respýblıkasyndaǵy Tótenshe jáne Ókiletti Elshisi Nurlan Onjanov quttyqtaý sóz sóıledi.

«Qazaq handyǵy. Almas qylysh» fılminiń kórsetilimi aldynda týyndynyń rejısseri Rústem Ábdirashev kórermendermen kezdesti.

Rejısser fılmge negiz bolǵan tarıhı oqıǵalar, kartınanyń túsirilý erekshelikteri jáne sol kezeńdegi oqıǵalardyń ekranda kórkemdik turǵydan beınelenýi týraly áńgimeledi.

Kórsetilimderge jergilikti turǵyndar, stýdentter, nemis kınorejısserleri, isker toptardyń jáne Germanııadaǵy qazaq dıasporasynyń ókilderi qatysty.

Qazaqstan kınosy kúnderi «Jeruıyq» kórkem fılminiń kórsetilimimen jalǵasty.

Bul týyndy arqyly kórermender adam taǵdyry, tarıhı jady jáne rýhanı qundylyqtar taqyrybyn qozǵaıtyn qazaqstandyq kıno ónerimen tanysty.

Osylaısha Berlınde ótken mádenı is-shara nemis kórermenderine Qazaqstannyń tarıhı taqyryptaǵy kórkem fılmderin tamashalaýǵa múmkindik berdi.

Aıta keteıik, bıyl aqpanda Túrkııanyń Antalııa qalasynda da qazaq kınosynyń kúnderi ótken bolatyn. Onda «Uly Dala tańy», «Jeruıyq» jáne «Qaıtadan» kórkem fılmderi túrik kórermenderine usynyldy.