Berlınde Batys Nil vırýsy jyldam taralyp jatyr — zertteý
ASTANA. KAZINFORM — Buryn ońtústik aımaqtarda ǵana kezdesetin Batys Nil vırýsy endi Germanııa astanasynda turaqty túrde tarala bastaǵan. Mundaı qorytyndyny Berlındegi «Sharıte» klınıkasynyń ǵalymdary jasady, dep habarlaıdy Bild.
Ǵalymdar 24 myń masany zerttep, 2023 jyly olardyń 6%-ǵa jýyǵy vırýs tasymaldaýshysy bolǵanyn anyqtady. Bul kórsetkishter Ońtústik Eýropadaǵy derektermen shamalas.
Eń úlken qaýip tabıǵı qoryqtarda emes, adamdar kóp jınalatyn jerlerde — saıabaqtarda, zırattarda jáne baqsha ýchaskelerinde baıqalady. Zertteýshiler dál osy jerlerde juqtyrǵan masalardyń eń kóp shoǵyrlanǵanyn tirkedi. Mamandardyń pikirinshe, bul aımaqtardaǵy qustar vırýstyń taralýynda mańyzdy ról atqarady.
Juqtyrǵandardyń kópshiliginde aýrý belgisi bolmaıdy. Alaıda ár besinshi adamda tumaýǵa uqsas belgiler baıqalýy múmkin. Al shamamen 1% jaǵdaıda ınfektsııa menıngıtke ákelip, ómirge qaýipti bolýy yqtımal. Ásirese qart adamdar táýekel tobynda bolady.
Vırýsologtardyń aıtýynsha, tirkelmegen jaǵdaılar óte kóp. Berlındegi naqty juqtyrǵandar sany resmı málimetten keminde 100 ese kóp bolýy múmkin. Klımattyń ózgerýi jaǵdaıdy odan ári ýshyqtyryp, aýrý juqtyrý jaǵdaılarynyń kóbeıýine sebep bolýy yqtımal.
Buǵan deıin Berlın dárigerleri Ebola juqtyrǵan amerıkalyqty emdep shyǵarǵany týraly habarlaǵan bolatynbyz.
