Berlınde Alatau City boıynsha 11 kelisimge qol qoıyldy
ASTANA.KAZINFORM — Alatau City ınvestıtsııalyq roýd-shoýy aıasynda Qazaqstan Respýblıkasy Premer-mınıstriniń orynbasary Qanat Bozymbaev Berlınde Germanııanyń federaldyq memlekettik organdary men iskerlik toptarynyń ókilderimen kelissózder júrgizdi. Bul týraly Úkimettiń baspasóz qyzmeti habarlady.
Ónerkásip, energetıka, qurylys jáne qalalyq ınfraqurylym salalaryna germanııalyq ınvestıtsııalar men tehnologııalardy tartý máseleleri talqylandy.
Germanııa Federaldyq kantsleriniń halyqaralyq ekonomıkalyq saıasat jónindegi keńesshisi Levın Hollemen kezdesýde Prezıdent Qasym-Jomart Toqaevtyń 2026 jylǵy qyrkúıekte Germanııaǵa sapary barysynda usynǵan Qazaqstan-Germanııa ınvestıtsııalyq-qarjylyq platformasyn qurý máselesi qaraldy. Platforma aıasyndaǵy pılottyq bastamalar retinde Alatau City-diń ınfraqurylymdyq jáne ónerkásiptik jobalary usynyldy.
Germanııanyń Federaldyq turǵyn úı sharýashylyǵy, qala qurylysy jáne qurylys mınıstrliginiń stats-hatshysy Olaf Ioahımmen zamanaýı qurylys tehnologııalary men energııalyq tıimdi sheshimderdi engizý máseleleri talqylandy. Germanııa Syrtqy ister mınıstrliginiń Eýropa isteri jónindegi stats-mınıstri Gýnter Krıhbaýmmen ekijaqty ekonomıkalyq yntymaqtastyqty odan ári damytý perspektıvalary qaraldy.
Berlındegi roýd-shoýdyń negizgi is-sharasy Germanııa ekonomıkasynyń Shyǵys komıteti men Germanııa ónerkásibiniń federaldyq odaǵynyń (BDI) qatysýymen uıymdastyrylǵan Alatau City Investment Round Table ınvestıtsııalyq dóńgelek ústeli boldy. Qanat Bozymbaev qalanyń ınvestıtsııalyq múmkindikterin, sondaı-aq ınvestorlardyń quqyqtaryn qorǵaý tetikteri men ınvestıtsııalyq preferentsııalardy kózdeıtin arnaıy quqyqtyq rejımniń negizgi erejelerin tanystyrdy.
BDI basshylyǵynyń múshesi Volfgang Nıdermarkpen kezdesýde germanııalyq kásiporyndardyń 2026-2028 jyldarǵa arnalǵan ónerkásiptik, tehnologııalyq jáne shıkizattyq yntymaqtastyq jónindegi jol kartasyn júzege asyrýǵa qatysý múmkindikteri, sondaı-aq Alatau City aýmaǵynda jańa óndiris oryndaryn ornalastyrý máseleleri talqylandy.
Henkel, SVEVIND Energy, Textima, dena jáne basqa da kompanııalardyń ókilderimen óndiristerdi lokalızatsııalaý, energetıkalyq jáne sý ınfraqurylymyn damytý, mashına jasaý salasyndaǵy ónerkásiptik kooperatsııa, sondaı-aq kópbeıindi medıtsınalyq ortalyq qurý máseleleri qaraldy.
Berlın kezeńiniń qorytyndysy boıynsha ónerkásiptik óndiris, mashına jasaý, qurylys, medıtsınalyq ınfraqurylym, qalalyq qaýipsizdik jáne ushqyshsyz tehnologııalar salalaryndaǵy yntymaqtastyq týraly 11 kelisimge qol qoıyldy.
Alatau City ınvestıtsııalyq roýd-shoýy Frankfýrt-na-Maıne qalasynda jalǵasady. Baǵdarlama aıasynda Germanııanyń bankteri men qarjy ınstıtýttarynyń ókilderimen kelissózder, sondaı-aq iskerlik toptardyń qatysýymen ınvestıtsııalyq dóńgelek ústel ótkizý josparlanǵan. Negizgi nazar Alatau City-diń ınfraqurylymdyq jáne ınvestıtsııalyq jobalaryn qarjylandyrý máselelerine aýdarylady.
Aıta ketelik Alatau City jobasyna $1,3 mlrd ınvestıtsııa tartý kózdelgeni týraly jazǵan edik.
