Berlınde 45 myńǵa jýyq úı jaryqsyz qaldy

ASTANA. KAZINFORM – Germanııa astanasynda elektr energııasy sónip qaldy, dep habarlaıdy Kazinform tilshisi.

Stromnetz Berlin elektrmen qamamasyz etý júıesi operatorynyń habarlaýynsha, Berlınniń ońtústik-batysynda 45 400 úı men 2200 kásiporyn jaryqsyz qalǵan.

Elektrdyń qýatynyń úzilýine órt sebep bolǵan.

4 qańtar kúni tań ata elektrmen jabdyqtaý ishinara qalpyna keltirilgen. Shamamen 7 myń úı men 150 kásiporynǵa elektr qýaty berilgen. Soǵan qaramastan 35 myń sharýa qojalyǵy elektr qýaty men jylýsyz qalǵan.

Ásirese Nıkolasse, Tselendorf, Vanzee jáne Lıhterfeld aýdandary qatty zardap shekken.

Elektr energııasynyń sóndirilýi men kúnniń sýyqtyǵyna baılanysty Shteglıts-Tselendorf ákimshiligi men gýmanıtarlyq uıymdar zardap shekkenderge ýaqytsha turý oryndaryn uıymdastyryp jatyr.

Polıtsııa áleýmettik jelilerde elektr qýatynyń sóndirilýi uıaly jáne statsıonarlyq baılanysqa áser etýi múmkin ekenin aıtty.

Oqıǵa bolǵan jerlerde shuǵyl qyzmet ókilderi jumys istep jatyr. Turǵyndar qandaı da bir tótenshe nemese onymen baılanysty jaǵdaı týyndaǵanda polıtsııaǵa habarlasa alady. Polıtsııa sonymen qatar túngi ýaqytta sholǵynshylar sanynyń artqanyn málim etti. Qajetti aýdandarǵa 300 polıtsııa qyzmetkeri jiberilgen. Al Berlınniń órt sóndirý qyzmeti birneshe shuǵyl qyzmet ortalyǵyn uıymdastyrdy.

Osyǵan deıin Germanııada birer aptada úshinshi bankke ury túskeni týraly habarladyq.