Berlınde 40 myń úı jaryqsyz qaldy — qasaqana dıversııa bolýy múmkin

ASTANA. KAZINFORM — Berlın jurty elektr jaryǵynsyz qaldy. Polıtsııa qasaqana dıversııa bolýy múmkin ekenin joqqa shyǵarmaıdy, dep jazdy DW.

Búgin tańerteń Germanııa astanasynyń ońtústik-shyǵysynda jappaı elektr jaryǵy óshti. Welt gazetiniń habarlaýynsha, Iohannıstal men Kenıgshaıdeveg aýdandaryndaǵy eki joǵary kerneýli jelide shyqqan órt birneshe jaqyn mańdaǵy qosalqy stantsııalardyń jumysyn toqtatýǵa sebep bolǵan.

Shamamen 40 myń úı men páter jaryqsyz qaldy. Apat oryn alǵan aýdandarda jol belgileri (svetoforlar) istemeı qaldy, qoǵamdyq kólik qozǵalysy shekteldi.

Órt jedel sóndirilgenimen, energetıkalyq ınfraqurylymdy qalpyna keltirý jumystary áli jalǵasyp jatyr.

Welt derekkózderiniń habarlaýynsha, polıtsııa oqıǵanyń qasaqana uıymdastyrylǵany (órteý áreketi) degen nusqany da qarastyrýda. Memlekettik qaýipsizdik organdary tergeýge tartylǵan.

Aıta keteıik, Germanııada áleýmettik járdemaqyny zańsyz ıelenetin «mafııaǵa» qarsy kúres bastaldy.