Berlınale kınofestıvaliniń baıqaý baǵdarlamasy jarııalandy: Qazaqstan qandaı fılm usyndy

ASTANA. KAZINFORM — Berlınde 76-shy Berlın halyqaralyq kınofestıvaliniń konkýrstyq baǵdarlamasy tanystyryldy, dep habarlaıdy DW.

Óner akademııasynyń habarlaýynsha, basty marapattar — «altyn jáne kúmis aıýlar» úshin 22 fılm talasady.

Negizgi baıqaýǵa anımatsııadan bastap trıllerler men tarıhı dramalarǵa deıingi ár túrli janrdaǵy kartınalar kirdi. Qatysýshylar arasynda japon rejısseri Esıtosı Sınomıdyń anımatsııalyq fılmi bar. Germanııa birden úsh lenta usynady: Markýs Shleıntserdiń «Rose» tarıhı dramasy, Ilker Chataktyń «Gelbe Briefe» («Sary hattar») fılmi jáne Frantsııamen birge túsirilgen Angel Shanelektiń «Meine Frau weint» («Meniń áıelim jylaıdy») otbasylyq dramasy.

Konkýrstyq fılmderge tanymal akterler de qatysady. Chennıng Tatým «Josephine» dramalyq trıllerinde basty róldi somdady, al Sandra Hıýller ekranda erekshe erkektiń rólin somdaıdy. Kornel Mýndrýtso men Karım Aınýz da ózderiniń jańa týyndylaryn usynady.

Panorama Dokumente derekti fılm baǵdarlamasynda frantsýz fılmi «Un hiver russe» («Orys qysy»), sondaı-aq ýkraın-polıak taspasy «Traces» («Іzder») kórsetiledi. Berlinale Shorts bóliminde kórermender ıakýt derekti fılmi Evgenııa Arbýgaevanyń ejelgi tirshilik ıesiniń qaldyqtaryn izdep máńgilik muzǵa túsetin ǵalym týraly «Chýýra» fılmin kóredi. Bul baıqaýǵa reseılik rejısser Sasha Svırskııdiń Germanııada túsirilgen «Unidentified Nonflying Objects (UNO)» («Ushpaıtyn belgisiz nysandar») anımatsııalyq fılmi qatysady.

Qazaqstan Forum Special arnaıy baǵdarlamasynda rejısser Krıstına Mıhaılovanyń «River Dreams» («Ózenniń armandary») tolyqmetrajdy derekti fılmi tanystyrylady. Ol Berlınale tarıhyndaǵy ekinshi qazaq áıel rejısseri boldy. Fılm poetıkalyq túrde ashylady: jas qyz-kelinshekter ózderin ózen dep sanaıdy. Týyndynyń ortasynda qazaq áıelderiniń erlerge táýelsizdigi, erkindik pen ómirge degen kózqarasy kórsetiledi.

Festıvaldiń basty jańalyǵy aýǵan rejısseri Sharbaný Sadattyń «No Good Men» («Jaqsy er adamdar joq») kartınasy bolmaq. Kartınanyń álemdik premerasy 12 aqpanda ótedi. Bul Sharbaný Sadattyń úshinshi tolyqmetrajdy fılmi. Týyndyda aýǵan áıelderiniń taǵdyry, patrıarhaldyq qoǵamdaǵy mahabbat pen úmit týraly jeke jáne saıası oqıǵa baıandalady.

Berlın halyqaralyq kınofestıvali 2026 jyldyń 12-22 aqpany aralyǵynda ótedi.

Jýyrda kıno tarıhyndaǵy eń kóp tabys tapqan aktrısa anyqtaldy.