Berlın týrnırinde Elena Rybakına men Arına Sobolenko kezdese me
ASTANA. KAZINFORM — Berlınde (Germanııa) 15-21 maýsym aralyǵynda ótetin WTA 500 týrnırinde álemniń birinshi jáne ekinshi raketkalary Arına Sobolenko men Elena Rybakına baq synaıdy.
Bul A.Sobolenko úshin kógal maýsymyndaǵy alǵashqy jarys bolmaq.
Jarystyń 1-raketkasy bolyp tirkelgen Belarýs ókili ekinshi aınalymda reseılik Ekaterına Aleksandrova nemese aýstrııalyq Anastasııa Potapovanyń qaı jeńgenimen sheberlik baıqasady.
Dodanyń 2-raketkasy E.Rybakına da ekinshi aınalymnan bastaıdy. Ol horvatııalyq Donna Vekıch nemese fılıppındik Aleksandra Ealanyń bireýimen oınaıdy.
Qazaqstandyq tennısshi osynyń aldynda London (Ulybrıtanııa) WTA 500 týrnıriniń shırek fınalynda kútpegen jerden reıtıngide 73-oryndaǵy ulybrıtanııalyq Ketı Býlterden jeńilip qaldy — 5:7, 6:2, 4:6.
Dál osy K.Býlterdi 6:1, 6:3 esebimen oısyrata utqan D. Vekıch fınalǵa shyqty. Ol búgin sońǵy básekede ulybrıtanııalyq Emma Radýkanýmen chempıondyq ataqty sarapqa salady.
Ótken jyly E.Rybakına Berlınde shırek fınalǵa deıin jetip, onda 2 saǵat 42 mınýtqa sozylǵan tartysty matchta A.Sobolenkoǵa 6:7 (6:8), 6:3, 6:7 (6:8). Osy oıynda Elena tórt birdeı matchbolyn paıdalana almaı, qapy qaldy.
Bıyl álemniń qos úzdik tennısshisi fınalda ǵana kezdesýi múmkin. Álemdik reıtıngide kósh basyndaǵy A.Sobolenkonyń esebinde 9 090 upaı bolsa, E.Rybakına (8 143 upaı) kógal maýsymyn sátti ótkizse, araqashyqtyqty qysqarta alady. Tipti qýyp jetip, basyp ozýy da yqtımal. Ol ekeýiniń aldaǵy jarystardy, sonyń ishinde Ýımbldondy qalaı ótkizetinine baılanysty.
Eske sala keteıik, budan buryn Aleksandr Býblıktiń Germanııadaǵy týrnırde chempıondyq ataǵyn qorǵaı ala ma, sony jazǵan edik.
