Berlın týrnıri: Rybakına týǵan kúninde amerıkalyq tennısshiden ese qaıyrdy

ASTANA. KAZINFORM – Qazaqstannyń birinshi, álemniń 11-raketkasy Elena Rybakına Berlın (Germanııa) WTA 500 týrnıriniń ekinshi aınalymyna shyqty.

Búgin 26 jasqa tolǵan qazaqstandyq tennısshi birinshi aınalymda álemniń 4-raketkasy, qytaılyq Chjen Tsınvenmen kezdesýi kerek edi. Alaıda qytaılyq sportshy jarysqa qatysýdan bas tartty da, onyń ornyna álemniń 33-raketkasy, amerıkalyq, 21 jastaǵy Eshlın Krıýger shaqyryldy.

Bıyl Maıamı (AQSh) WTA 1000 týrnıriniń ekinshi aınalymynda Krıýger Rybakınany 6:4, 2:6, 6:4 esebimen jeńip ketken edi. Bul joly Elena eki breıkpen matchty sátti bastady – 4:0. Qarsylasy qaıyra breık jasaǵanymen, Rybakına setke dop bergende, óz múmkindigin jibergen joq – 6:3.

Ekinshi partııada Rybakına 3:1 esebimen alǵa ketkenimen, Krıýger tarazy basyn teńestire bildi – 3:3. Aqyry taı-breıkte qazaqstandyq tennısshi matchty jeńispen túıindedi – 7:6 (7:3).

Bir saǵat 36 mınýtqa sozylǵan básekede Rybakına 5 eıspen birge 8 breık-poınttyń úsheýin óz esebine jazdy. Krıýger 2 eıs, 2 breıkpen (5 breık-poınt) kózge tústi.

Osylaısha, E.Rybakına E.Krıýgerden qarymta qaıyrdy.

- Óz týǵan kúnime ózim syı jasaı aldym. Tartysty órbigen ekinshi sette qarsylasym qaıyra breık jasaı bildi. Soǵan qaramastan, oıyn meniń paıdama sheshildi, - dedi E.Rybakına matchtan soń suhbatynda.

Elena Rybakına shırek fınalǵa shyǵý úshin álemniń 74-raketkasy, chehııalyq Katerjına Sınıakovamen talasady. Júlde qory 925 661 eýroǵa baǵalanǵan Berlın dodasy 22 maýsymda aıaqtalady.

Ótken jyly fınalda reseılik Anna Kalınskaıadan basym túsken amerıkalyq Djessıka Pegýla chempıon atanǵan edi. E.Rybakına 2024 jyly shırek fınaldan asa almaǵan bolatyn.

Eske sala keteıik, budan buryn Tımofeı Skatovtyń Polshadaǵy jarystyń ekinshi aınalymyna ótkenin jazǵan bolatynbyz.

Sondaı-aq Zarına Dııas Ispanııadaǵy jarysty jeńispen bastady.