Berlın turǵyny pavlodarlyq polıtseıge alǵys aıtty
PAVLODAR. QazAqparat – Pavlodarda 21-22 mamyrda onlaın rejımde «Joldaǵy qabyldaý»respýblıkalyq aktsııasy ótkizildi, dep habarlaıdy QazAqparat Pavlodarnews.kz-ke silteme jasap.
Oblystyq polıtsııa departamenti baspasóz qyzmetiniń málimetinshe, bul kúnderi saǵat 09:00-den 19:00-ge deıin polıtsııa departamentiniń «Azamattarǵa arnalǵan qabyldaý bólmesinde», sondaı-aq qalalyq jáne aýdandyq polıtsııa bólimderinde azamattardy jeke qabyldaý júrgizildi.
Onda jol jáne qoǵamdyq qaýipsizdikti qamtamasyz etý, kóshi-qon zańnamasy, avtokólikti tirkeý, jol qozǵalysyn uıymdastyrý, kólik quraldaryn qaıta jabdyqtaý, sondaı-aq ákimshilik quqyq buzýshylyqtar úshin aıyppul tóleý máseleleri boıynsha túsiniktemeler men keńester berildi.
- 21 mamyrda, kúni boıy dp_pavlodar Instagram akkaýntynan onlaın rejıminde polıtsııa departamentiniń jeti myńǵa jýyq oqyrmany ózderin qyzyqtyrǵan suraqtarǵa jaýap pen keńes aldy. Suraqtardyń basym bóligi avtokólik júrgizýshilerinen kelip tústi, - deıdi polıtsııa departamentiniń baspasóz qyzmeti.
Aıta ketý kerek, keıbir máseleler dereý sheshildi. Mysaly, tikeleı efır kezinde Pavlodar qalasynyń turǵyny polıtsııa departamenti bastyǵynyń birinshi orynbasary Jasqaırat Qaıyrovqa habarlasyp, Pavlov kóshesinde jol belgisi synǵanyn aıtty. Dereý atalǵan meken-jaıǵa osy aqaýlyqty ornyna keltirýge polıtsııa qyzmetkerleri jiberildi.
Sonymen birge jergilikti polıtsııa qyzmeti basqarmasy bastyǵynyń orynbasary Qýanysh Mustafınovqa tikeleı efırde Germanııanyń Berlın qalasynyń turǵyndary avtokólikterdi qaıta rásimdeý boıynsha keńes alý úshin júgindi. Shetel azamattaryna tolyq aqparat berildi.
Genrıh Gaft jedel keńes bergeni úshin Pavlodar polıtsııasyna alǵysyn bildirdi.
