Berlın dárigerleri Ebola juqtyrǵan amerıkalyqty emdep shyǵardy
ASTANA. KAZINFORM – Germanııanyń Berlın qalasyndaǵy «Sharıte» klınıkasynyń dárigerleri Kongo Demokratııalyq Respýblıkasynda Ebola vırýsyn juqtyrǵan amerıkalyq dárigerdi emdep shyqty, dep habarlaıdy Deutsche Welle.
Klınıka málimetinshe, 17 kún boıy em qabyldaǵan naýqas dertten tolyq aıyqqan. Onymen birge karantınde bolǵan otbasy músheleri de aýrý juqtyrmaǵandyqtan úılerine jiberildi.
39 jastaǵy hırýrg Pıter Stafford Kongoda Serge hrıstıandyq mıssıonerlik uıymy quramynda jumys istegen. Ol operatsııa jasaý kezinde Ebola vırýsyn juqtyrǵan.
Dárigerler naýqasty emdeý barysynda qazir synaqtan ótip jatqan eksperımenttik terapııa ádisterin qoldanǵan. «Sharıte» klınıkasynyń habarlaýynsha, 20 mamyrda aýrýhanaǵa túsken kezde naýqasta Ebolanyń aıqyn belgileri baıqalǵan. Alaıda vırýsqa qarsy emdeý men qoldaýshy terapııanyń arqasynda aǵzadaǵy vırýs júktemesi aıtarlyqtaı tómendegen.
30 mamyrdan bastap dárigerdiń aǵzasynan vırýs anyqtalmaǵan.
Naýqastyń jubaıy da dáriger, sondaı-aq olardyń balalary juqtyrý qaýpi joǵary adamdar retinde karantınde bolǵan. Alaıda tekserý nátıjeleri olardyń vırýs juqtyrmaǵanyn kórsetip, shekteýler alynyp tastaldy.
Dúnıejúzilik densaýlyq saqtaý uıymynyń málimetinshe, mamyr aıynyń sońynda Kongo Demokratııalyq Respýblıkasy men kórshiles Ýgandada Ebola juqtyrýdyń 900-den astam jaǵdaıy tirkelip, 84 adam qaıtys bolǵan.
DDU 17 mamyrda Býndıbýgıo shtamynyń taralýyn halyqaralyq deńgeıdegi densaýlyq saqtaý salasyndaǵy tótenshe jaǵdaı dep baǵalaǵan. Halyqaralyq uıym Ebola indetimen kúresý úshin 518 mln dollarlyq baǵdarlamany iske qosty.
