Berlın býrgomıstri Klaýs Voveraıt: «Islam - Berlınniń bir bóligi»
ASTANA. 22 sáýir. QazAqparat - Germanııa astanasynda dástúrge aınalǵan «Berlındegi ıslam aptalyǵy» uıymdastyryldy.
Atalmysh shara osy eldegi salty men tili, tanymy men mádenıeti basqa, nanym-senimi ózge turǵyndar men musylmandar arasyndaǵy dinaralyq dıalogtyń ajyramas bir bóligindeı bolyp otyr, dep jazady muslim.kz.
«Іslamwoche-berlin.de saıtynda habarlanǵandaı, jarastyq pen jasampazdyqqa bastaıtyn osynaý sharada negizinen ǵylym men bilim jáne moraldyq qundylyqtar tóńireginde máseleler qozǵalǵan. Sondaı-aq, zaıyrly qoǵamdaǵy dinniń orny men dinder arasyndaǵy ózara qatynas, demokratııalyq qundylyqtar, dinı ortadaǵy jeke adamnyń róli, nemis qoǵamyndaǵy musylmannyń róli sekildi dástúrge aınalǵan, mańyzyn joımaıtyn taqyryptar arqaý bolǵan», dep habarlaıdy Áziret Sultan meshitiniń resmı saıty.
Atalmysh aptalyqqa saıası qaıratkerler men óner ókilderi, ǵalymdar, bıznesmender jáne BAQ tilshileri qatysqan. Bul sharanyń Berlın býrgomıstri Klaýs Voveraıttyń jetekshiligimen ótkenin aıta ketý kerek. «Islam - Berlınniń bir bóligi. Astanamyzda hrıstıandardan keıin musylmandardyń qarasy kóp», - dep málimdedi ol.
«Álem jurtshylyǵy musylmandardyń tynys-tirshiligin bile bermeıdi. Ol ol ma, ara-tura dinı arazdyq týyp, túsinbestik oryn alyp jatady. Nemis tildi musylmandardyń osyndaı sharany uıymdastyrǵanyna rıza boldym. Men bul bastamany qoldaımyn», - deıdi ol sózin tolyqtyryp.
